Brazılııalyq sotsıalıster qaıtys bolǵan prezıdenttikke úmitkerdi almastyratyn adamdy tapty
ASTANA. QazAqparat - Brazılııanyń aldaǵy prezıdentik saılaýyna úmitkerinen aıyrylǵan sotsıalıstik partııanyń kóshbasshylary jańa úmitkerdi tańdady. Bul týraly Associated Press-ke silteme jasaı otyryp, lenta.ru habarlady.
Ushaq apatynan qaza tapqan Edýard Kampýshtyń ornyna eldiń burynǵy qorshaǵan ortany qorǵaý mınıstri Marına Sılva (Marina Silva) keldi.
56 jastaǵy Sılva sotsıalısterge az ýaqyt buryn, dálirek aıtsaq 2013 jyly qosylǵan bolatyn. Ol kezde oǵan óz partııasyn qurýǵa azdaǵan ǵana daýys jetpeı qalǵan. Degenmen onyń qoldaýshylary kóp, saıasatker áıel 2010 jylǵy saılaý kezinde saılaýshylardyń 20 paıyz daýysyn jınaǵan edi.
Aıta keteıik, Kampýsh pen onyń 6 serigi Santos qalasynyń mańynda Cessna 560XL jekemenshik ushaǵynyń apatqa ushyraýynan mert boldy. Brazılııa Prezıdenti Dılma Rýsef osy oqıǵaǵa baılanysty úsh kúndik aza tutý jarııalap, óziniń saılaýaldy naýqanyn toqtata turdy.
Keıbir derekterge qaraǵanda, vıtse-prezıdenttikke úmitker retinde Kampýshpen birge ushý kerek bolǵan Sılva dál sońǵy ýaqytta saparǵa attanbaı qalǵan.
49 jastaǵy Kampýsh 2014 jyldyń 4 qazanynda ótetin prezıdenttik saılaýǵa jan-jaqty daıyndyqta edi. Áleýmettik saýalnamalar boıynsha ol prezıdenttikke úmitkerlerdiń qaarynda úshinshi satyda kele jatqan. Ony barlyq saılaýshylardyń 10 paıyzy qoldady.
