Brazılııalyq oıynshy «Aqtóbe» fýtbol klýbynan ketti
ASTANA. QazAqparat - «Aqtóbe» fýtbol komandasy jáne brazılııalyq qorǵaýshy Fabrısıo Sılva Dornessal arasyndaǵy eńbek sharty oıynshynyń qalaýymen buzyldy, dep habarlaıdy «SPORTINFORM» SAA klýbtyń resmı saıtyna silteme jasap.
«Men bul klýbpen jáne qalanyń ózimen qımastyqpen qoshtasyp jatyrmyn. Alaıda buǵan birneshe sebepter túrtki bolǵandyqtan, osylaı jasaýǵa májbúrmin. Birinshiden, otbasy jaǵdaıyma baılanysty, al ekinshiden, bul jerde keleshegimdi elestete almaımyn, sebebi kelisimshartqa qol qoımas buryn, bizge Eýropa Lıgasyndaǵy orynǵa oınaıtynymyzdy aıtqan, alaıda sanktsııalardyń kesirinen 6 upaıymyzdy alyp qoıdy. Dál qazir týrnırlik kesteniń eń sońǵy ornynda kele jatyrmyz. Men Nekomen sóılestim, oǵan qaryzdyń qaıtarylatyn túri joq. Endi, mine, oıynshylardy eki transfer maýsymyna tirkeýge tyıym salyndy. Sondaı-aq, maǵan komandadan taǵy da 6 upaı alynatynyn aıtty. Klýbqa jańa múmkindikter syılaǵany úshin rahmet, al jankúıerlerge únemi keremet atmosfera jasap, qoldaý kórsetkenderi úshin alǵysymdy bildiremin. «Aqtóbe» meniń júregimde máńgi qalady», - dedi brazılııalyq fýtbolshy.
Eske salaıyq, klýbta ornaǵan jaǵdaı týraly «Aqtóbeniń» bas dırektory Samat Smaqov túsinik bergen. Onyń aıtýynsha, klýb jumysyn toqtatýy múmkin.
