Brazılııalyq Mıshel Telonyń ánine dombyra áýeni erekshe ár berdi
ASTANA. 9 sáýir. QazAqparat - Astanada erekshe patrıottyq fleshmob-aktsııasy ótti. Saýda oıyn-saýyq ortalyqtarynyń birinde 100-den astam jastar brazııalyq ánshi Mıshel Telonyń (Michel Telo) oryndaýyndaǵy álemge tanymal «Neımar bıin» bıledi.
«Nosa Nosa» ániniń yrǵaǵyna dombyranyń áýeni qosyldy. Tanymal áýenniń yrǵaǵyna bıleı ketken jastar óz qımyldaryn qosyp, bıdi odan saıyn qyzdyra tústi. Uıymdastyrýshylar brazılııalyq óleńniń sońǵy qaıyrmasyn ózgertip, jýyrda bastaý alǵan «Bolashaq búginnen bastalady! atty is-sharanyń uranyn qosty. Osylaısha bul óleńniń «qazaqı nusqasy» paıda boldy.
Jeksenbide ótken «Bolashaq bıi» aktsııasy belsendilerdi jınady. Olar Qazaqstannyń Jastar Kongresi jáne «QazBrend» qoǵamdyq qorymen Youtube saıtynda jarııalanǵan beınege ún qatýdy jón kórgen. Endi uıymdastyrýshylar ótkizilgen fleshmobta túsirilgen beıneni Internetke jarııalap, Nosa Nosa yrǵaǵynyń qazaqstandyq nusqasynan rıngton jasamaq.
Bıge qatysty qysqasha aıta ketsek, brazılııalyq ánshi Michel Telo-nyń oryndaýyndaǵy "Ai se eu te pego" áni barlyq mýzykalyq hıt-paradtardan kórindi. Ánniń tanymaldylyǵyna gol soǵylǵannan keıin osy ánniń áýenine Ai Se Eu Te Pego qımyldaryn jasaıtyn fýtbolshylardyń «jarnamasy» septigin tıgizdi. Osydan keıin túsirilgen bul beınekórinis búkil álem boıynsha taraldy. Bıdiń qyzyq ta, eliktire túser qadamdaryn birinshi oryndaǵan brazılııalyq fýtbolshy Neımardan keıin bul jastar arasynda tanymal bola bastady.
«Qazaqstanda sáýirde respýblıkalyq aqparattyq áleýmettik «Bolashaq búginnen bastalady!» atty is-shara bastaldy. Osyǵan oraı Astana qalasynyń jastary fleshmob ótkizý arqyly is-sharany qoldaýdy jón kórdi», - deıdi Qazaqstan Jastar Kongresiniń ókili Inara Káribaeva.
