Snıýs, nasybaı, kalıan: Astanada ondaǵan mekeme men júzdegen azamatqa aıyppul salyndy
ASTANA. KAZINFORM - Elordada shegilmeıtin temeki ónimderin zańsyz satý men tutynýdyń aldyn alý jáne anyqtaý maqsatynda aýqymdy profılaktıkalyq reıdter jalǵasyp jatyr. Mundaı is-sharalar elordanyń barlyq alty aýdanynda ótkizilip keledi, dep habarlaıdy qala ákimdiginiń resmı saıty.
Saryarqa aýdanynda jyl basynan beri 120-dan astam reıd júrgizildi. Ýchaskelik ınspektorlar men ıývenaldy polıtsııa qyzmetkerleri saýda oryndaryn, qoǵamdyq tamaqtaný nysandaryn jáne jastar kóp jınalatyn oryndardy qamtydy. Іs-sharalar nátıjesinde belgilenbegen oryndarda shegilmeıtin temeki ónimderin qoldanýǵa baılanysty 315 quqyqbuzýshylyq anyqtaldy. Barlyq quqyqbuzýshy ákimshilik jaýapkershilikke tartyldy.
Almaty aýdanynda jyl basynan beri ótkizilgen reıdter barysynda 45 jeke tulǵaǵa aıyppul salyndy. Sonymen qatar nasybaı men snıýs syndy shegilmeıtin temeki ónimderi satylǵan 32 dúken anyqtaldy, Tekseris kezinde shamamen 1 000 dana ónim tárkilendi.
Baıqońyr aýdanynda jyl basynan beri 200-den astam shaǵyn jáne orta bıznes nysandary tekserildi. Oǵan saýda oryndary, saýda úıleri, sýpermarketter, kafeler, barlar men meıramhanalar kiredi. Nátıjesinde 53 quqyqbuzýshy ákimshilik jaýapkershilikke tartyldy.
Esil aýdanynda jyl basynan beri QR ÁQBtK-niń 441-babyn (sonyń ishinde kalıan shegýge tyıym salynǵan oryndarda qoldaný) buzǵany úshin 857 adam ákimshilik jaýapkershilikke tartyldy. Onyń ishinde 756 jaǵdaı kalıan shegýmen baılanysty bolyp otyr.
Saraıshyq aýdanynda júrgizilgen reıdterdiń nátıjesinde 5 dúken QR ÁQBtK-niń 196-baby boıynsha aıyppulǵa tartyldy. Jalpy salynǵan aıyppul somasy shamamen 500 myń teńgeni qurady.
Nura aýdanynda jyl basynan beri shegilmeıtin temeki ónimderin zańsyz satý boıynsha 6 derek anyqtaldy. Sonymen qatar qoǵamdyq tártipti saqtaý jáne zań talaptarynyń oryndalýyn baqylaý maqsatynda 18 oıyn-saýyq orny tekserilip, olardyń barlyǵynda ortaq paıdalaný oryndarynda kalıan shegý faktileri tirkeldi.
Barlyq quqyqbuzýshylyq QR ÁQBtK-niń 441-baby boıynsha rásimdelip, salynǵan aıyppuldyń jalpy somasy 4 mıllıon teńgeden asty.
Profılaktıkalyq reıdter qala boıynsha jalǵasady.
Eske sala keteıik, buǵan deıin elordada demalys kúnderi jármeńke ótetinin habarlaǵan edik.