Brazılııalyq qorǵaýshy «Qaırat» quramyna qosyldy

ASTANA. KAZINFORM — «Qaırat» fýtbol klýby brazılııalyq qorǵaýshy Lýkas Afrıkomen kelisimshartqa qol qoıylǵanyn habarlady.

Fýtbol klýbynyń málimetinshe, kelisim 2026 jyldyń sońyna deıin jaramdy.

— Lýkas Afrıko 30 jasta. Ortalyq qorǵaýshy pozıtsııasynda oınaıdy. Boıy — 188 sm, salmaǵy — 85 keli, — delingen habarlamada.

Lýkas Enrıke da Sılva San-Paýlý qalasynda dúnıege kelgen.

Kásibı mansabyn 2015 jyly Gýaralıýstaǵy «Flamengo» klýbynda bastaǵan. 

Keıin «Santos» pen «Londrına» syndy tanymal brazılııalyq klýbtardyń namysyn qorǵady. 

2018 jyly Eýropaǵa aýysyp, Portýgalııa chempıonatynda «Marıtımý» men «Eshtorıl» quramynda birneshe maýsym óner kórsetti.

2023 jyly Ázirbaıjannyń «Gabala» klýbynda oınap, keıin Portýgalııaǵa oralyp, «Farense» klýbymen kelisimshart jasasty.

Portýgalııanyń joǵary dıvızıonynda jalpy 75 match ótkizip, úsh gol soqty.

Brazılııalyq qorǵaýshynyń sońǵy klýby Túrkııanyń Birinshi lıgasynda óner kórsetetin «Van Spor» boldy. Onda 11 match ótkizdi. 

Budan buryn «Arsenal» – «Qaırat» matchynyń bıletteri satylymǵa shyqqanyn jazdyq.