Italııada qyz zorlaǵan brazılııalyq fýtbolshy jazasyn týǵan elinde óteıdi

ASTANA. KAZINFORM – Brazılııanyń, «Real Madrıd» jáne «Mılannyń» burynǵy shabýylshysy Robıno (Robson de Soýza) Italııada 10 jyl buryn qyz zorlaǵan. Osy qylmysy úshin ol toǵyz jyl túrmede otyrýy tıis edi, fýtbolshyny polıtsııasy tutqyndady, dep habarlaıdy VVS.

«Beısenbi kúni keshke federaldy polıtsııa Robıno degen atpen belgili Robson de Soýzany tutqyndaýǵa order berdi», - delingen polıtsııanyń málimdemesinde.

40 jastaǵy Robıno San-Paýlý shtatyndaǵy óziniń týǵan qalasy Santestaǵy páterinde ustaldy. Buǵan deıin jergilikti sýdıa onyń tólqujatyn tárkilep, elden shyǵýyna tyıym salǵan.

2017 jyly ıtalııalyq sot fýtbolshyny jáne taǵy bes adamdy 2013 jyly Mılandaǵy túngi klýbta Albanııanyń 22 jastaǵy qyzyn zorlaǵany úshin kináli dep taýyp, fýtbolshyny toǵyz jylǵa bas bostandyǵynan aıyrý jazasyna kesti.

Robıno taǵylǵan aıypty joqqa shyǵaryp, úkimge apellıatsııalyq shaǵym túsirdi, biraq apellıatsııalyq ınstantsııalar ony óz kúshinde qaldyrdy.

2022 jyldyń qańtarynda Italııanyń Joǵarǵy kassatsııalyq soty úkimdi rastap, sodan keıin Italııanyń Ádilet mınıstrligi fýtbolshyny qamaýǵa alýǵa halyqaralyq order berdi.

Italııa bıligi Robınony ekstradıtsııalaý týraly ótinish jiberdi, biraq Brazılııa óz azamattaryn shet elge berýden bas tartty.