Brazılııadaǵy joıqyn tornadodan júzdegen adam jaralandy

ASTANA. KAZINFORM — Eldiń ońtústigindegi Parana shtatyndaǵy tornadodan 6 adam qaza taýyp, 400-den astamy jaralandy, dep habarlaıdy Anewz.

Jyldamdyǵy 155 mılden asatyn tornado Rıo-Bonıto-dý-Igýasý men Gýarapýavede ondaǵan úıdi qıratyp, úkimetti zardap shekken aýdandarda tótenshe jaǵdaı jarııalaýǵa májbúr etti.

— Jel bárin qıratty. Qalany, úılerdi, mektepterdi qıratyp ketti. Aldaǵy kúnimiz ne bolady? — dedi Rozeleı Dalkandon óziniń burynǵy dúkeniniń qırandylarynyń arasynda turyp.

Sheneýnikter tornadodan birneshe saǵat ótken soń bir adamnyń iz-túzsiz joǵalyp ketkenin habarlady. Olar joǵalǵandar sany artady dep boljap otyr.

Qaza tapqan 6 adamnyń beseýi eresek, bireýi 14 jastaǵy qyz bala. Qurbandardyń 5-ýi Rıo-Bonıto-dý-Igýachý qalasynyń turǵyny, al bireýi Gýarapýavadan. 

Gýbernator kishi Karlos Massa Ratıno Parana shtatynda úsh kúndik qaraly kún jarııalady. Azamattyq qorǵanystyń baǵalaýy boıynsha Rıo-Bonıto-dý-Igýachý aımaǵynyń shamamen 90% zaqymdanǵan. 750-den astam adam, onyń ishinde balalar men júkti áıelderge medıtsınalyq kómek kórsetildi. On adamǵa ota jasaldy, qazir toǵyzynyń jaǵdaıy aýyr.

Brazılııa prezıdenti Lýıs Inasıý Lýla da Sılva áleýmettik jelide yntymaqtastyǵyn bildirip, aımaqqa shuǵyl kómek jiberiletinin jarııalady.

— Biz Parana turǵyndaryna qoldaý bildiremiz jáne barlyq qajetti kómekti kórsetýdi jalǵastyramyz, — dedi ol.

Bılik quıynnan zardap shekkenderge azyq-túlik, gıgıenalyq quraldar, brezent, matratstar jáne basqa da qajetti zattardy taratyp jatyr.

Osyǵan deıin Fılıppınniń astan-kesteńin shyǵarǵan «Kalmaegı» taıfýnynan 2,9 mıllıon turǵyn zardap shegip, 200-den astam adam qaza tapqynyn jazdyq.