Brazılııadaǵy sý tasqynynan qaza tapqandar sany 169-ǵa jetti

ASTANA. KAZINFORM – Brazılııada nóser jaýyn saldarynan bolǵan sý tasqynynan qaza tapqandar sany 169 adamǵa jetti, taǵy 56 adam iz-túzsiz joǵalǵandar tiziminde. Bul týraly Anadoly jazdy.

Úsh apta buryn eldiń ońtústigindegi Rıo-Grandı-dý-Sýl shtatynda nóser jańbyr jaýǵan. Brazılııa Azamattyq qorǵanys agenttiginiń málimetinshe, 469 aýylda izdeý-qutqarý jumystary jalǵasyp jatyr.

«Birqatar eldi mekende sý deńgeıi tómendep, sý jelileri qalpyna keltirilip, halyq birte-birte aýyz sýǵa qol jetkizip jatyr. 42 tas joldy, kópirdi jáne kóshelerdi sý basqan, olardy qalpyna keltirýge ýaqyt qajet», - delingen habarlamada.

Rıo-Grande-dý-Sýl shtatynyń gýbernatory Edýardo Leıte 3 mamyrda qutqarýshylardyń áli de birqatar aımaqqa jete almaı otyrǵanyn aıtty.

«Biz óte aýyr jaǵdaıdy bastan keshirip jatyrmyz. Bul synı oqıǵa emes, memleket tarıhyndaǵy eń joıqyn oqıǵa», – dedi ol.

Leıte qaıǵyly oqıǵanyń aýqymdylyǵyna baılanysty shtattyń 180 kúnge «tabıǵı apat jaǵdaıy» jarııalanǵanyn jáne adamdardy evakýatsııalaý úshin úlken jumystardyń júrgizilip jatqanyn aıtty.

Aıta keteıik, buǵan deıin Brazılııanyń ońtústigindegi klımattyq apattan qaza tapqandar sany 151-ge jetkenin habarlaǵan edik.