Brazılııadaǵy sý tasqynynan 39 adam qaza tapty
ASTANA. KAZINFORM – Brazılııanyń ońtústigindegi Rıo-Grandı-dý-Sýl shtatynda sý tasqynynan 39 adam qaza tapty. Bul týraly Reuters agenttigi habarlady.
Eldiń Azamattyq qorǵanys departamenti 70-ke jýyq adamnyń iz-túzsiz joǵalǵanyn habarlady. Tolassyz jaýǵan jańbyr shtattaǵy 497 qalanyń jartysynan kóbine áser etkendikten, kem degende 24 myń adam úıin tastap ketýge májbúr boldy.
«Bul sandar jaqyn kúnderi aıtarlyqtaı ózgerýi múmkin. Óıtkeni biz kóbirek aımaqtarǵa kirý múmkindigine ıe bolamyz», – deıdi shtat gýbernatory Edýardo Leıte.
Takýarı ózeniniń ańǵaryndaǵy barlyq qala tolyǵymen sý astynda qaldy. Keıbir qalalarda kósheler ózenge aınalyp, joldar men kópirler qırap qaldy. Sondaı-aq, sý tasqyny gıdroelektr torabynyń ishinara buzylýyna ákeldi. Shtat astanasy Portý-Alegrıde ózender arnasynan asyp, sý basqan kósheler qalanyń ortalyq aýdandaryna qatynaıtyn joldardy jaýyp tastady.
Buǵan deıin Brazılııanyń ońtústiginde tolassyz jaýǵan jańbyr saldarynan on adam qaza tapqany týraly jazǵan edik.
