Bolsonarý Brazılııadaǵy saılaý qarsańynda Tramp, Vens jáne Rýbıomen kezdesti
ASTANA. KAZINFORM – Brazılııa prezıdenttigine kandıdat Flavıo Bolsonarý saılaýaldy naýqanynyń halyqaralyq baǵytyn kúsheıtti. Brazılııa senatory Vashıngtonda AQSh prezıdenti Donald Tramppen, vıtse-prezıdent Djeı Dı Venspen jáne memlekettik hatshy Marko Rýbıomen kezdesti, dep habarlaıdy Reuters agenttigi.
Kezdesýler Brazılııadaǵy prezıdenttik saılaýǵa úmitkerdiń tóńiregindegi saıası daǵdarys aıasynda ótti. Buǵan deıin senator qazirgi ýaqytta túrmede otyrǵan bankırden ákesi – Brazılııanyń burynǵy prezıdenti Jaır Bolsonarý týraly fılm túsirý úshin qarjy bólýdi suraǵanyn moıyndaǵan edi. Alaıda Flavıo Bolsonarý zań buzdy degen aıyptaýlardy joqqa shyǵardy.
Bul aqparat buqaralyq aqparat quraldarynda jarııalanǵannan keıin Bolsonarýdyń qoǵamdyq pikir saýalnamalaryndaǵy kórsetkishteri tómendedi. Soǵan qaramastan, Brazılııadaǵy prezıdent saılaýynyń yqtımal ekinshi týrynda ol qazirgi prezıdent Lýıs Inasıý Lýla da Sılvamen shamalas qoldaý deńgeıin saqtap otyr.
AQSh-taǵy kelissózder barysynda taraptar uıymdasqan qylmyspen kúres, sırek jer metaldary salasyndaǵy yntymaqtastyq jáne sóz bostandyǵy máselelerin talqylady.
Flavıo Bolsonarý Donald Tramppen áńgime barysynda ákesi Jaır Bolsonarýdyń densaýlyǵy týraly másele de kóterilgenin aıtty. Brazılııanyń burynǵy prezıdenti memlekettik tóńkeris jasaýǵa árekettený isi boıynsha úkim shyqqannan keıin úıqamaqta otyr.
Eske sala keteıik, Jaır Bolsonarý 2022 jylǵy saılaýdan keıin Lýıs Inasıý Lýla da Sılvanyń prezıdent qyzmetine kirisýine kedergi keltirýge baǵyttalǵan astyrtyn áreketke qatysqany úshin kináli dep tanylyp, 27 jylǵa sottalǵan. Prokýrorlardyń málimdeýinshe, joǵary áskerı basshylyqtyń qoldaý kórsetpeýi saldarynan bul jospar júzege aspaı qalǵan.
Keıin Brazılııa Kongresi prezıdent vetosyn joıyp, burynǵy prezıdent Jaır Bolsonarýdyń túrmede otyrý merzimin qysqartýy múmkin zańdy maquldady. Sonymen qatar ol 2026 jylǵy prezıdent saılaýynda uly, senator Flavıo Bolsonarýdyń kandıdatýrasyn qoldaıtynyn málimdegen.
