Brazılııadaǵy prezıdent saılaýy: Lýla da Sılva men Bolsonarý ekinshi kezeńge ótti
ASTANA. KAZINFORM — Brazılııada prezıdent saılaýynyń birinshi kezeńinde kandıdattardyń eshqaısysy basym daýys jınaı almady. Sondyqtan saılaýdyń ekinshi kezeńi 25 qazanda ótedi. Bul týraly eldiń Joǵarǵy saılaý soty jarııalaǵan resmı nátıjelerde habarlandy, dep jazady Sınhýa.
Bıýlletenderdiń 99 paıyzdan astamy sanalǵannan keıin Brazılııanyń Lıberaldyq partııasynan prezıdenttikke kandıdat Flavıý Bolsonarý shamamen 47 paıyz daýys jınady. Al qazirgi prezıdent, Eńbekshiler partııasynyń kandıdaty Lýıs Inasıý Lýla da Sılva shamamen 45 paıyz daýyspen ekinshi orynǵa shyqty.
Brazılııanyń saılaý zańnamasyna sáıkes, prezıdenttikke kandıdat birinshi kezeńde jeńiske jetý úshin jaramdy daýystardyń jartysynan kóbin jınaýy kerek. Eger bul talap oryndalmasa, eń kóp daýys alǵan eki kandıdat ekinshi kezeńge ótedi.
Birinshi kezeńniń nátıjeleri jarııalanǵannan keıin eki kandıdat ta jeksenbi kúni keshke málimdeme jasady.
Baspasóz máslıhatynda Flavıý Bolsonarý saılaý nátıjesine kóńili tolatynyn aıtyp, Brazılııa men onyń halqyna qyzmet etý múmkindigine ıe bolýǵa úmit bildirdi.
— Brazılııa ózgeristi qalaıdy. Maǵan brazılııalyqtardy úkimetimniń basty nazarynda ustap, eldiń naqty máselelerin sheshýge kirisý úshin mandat qajet, — dedi ol.
San-Paýlýda sóz sóılegen Lýıs Inasıý Lýla da Sılva birinshi kezeńde jeńiske jetemin dep kútkenin moıyndady. Alaıda ol saılaý nátıjesin halyqtyń bergen sabaǵy dep baǵalady.
Ol saılaýaldy naýqanyn ekonomıkany damytý jáne áleýmettik ıntegratsııa máselelerine baǵyttaıtynyn aıtyp, birinshi kezeńde daýys bermegen azamattardy ekinshi kezeńge qatysýǵa shaqyrdy.
— Ekinshi kezeń ótedi. Endi synaqtyń ýaqyty keldi, Brazılııanyń shynaıy beınesin kórsetetin kez jetti, — dedi Lýla da Sılva.
Aıta keteıik, osyǵan deıin Brazılııada prezıdent saılaýy ótip jatqany týraly jazǵan bolatynbyz.
