Brazılııadaǵy nóser jaýyn saldarynan mert bolǵandar sany 30-ǵa jetti

ASTANA. KAZINFORM – Brazılııada 23 aqpan kúni nóser jaýyn saldarynan týyndaǵan sý tasqynynan mert bolǵandar sany 30 adamǵa jetti. Degenmen iz-túzsiz ketken 40 adamdy izdeý-qutqarý jumystary áli júrip jatyr.

Mınas-Jeraıs shtatynyń órt sóndirý qyzmeti Jýıs-de-Fora jáne Ýba qalalarynda qurbandar sany artqanyn habarlady. Іzdeý jumystary úzdiksiz júrgizilip jatyr.

Bılik óńirde jaýyn-shashyn jalǵasatynyn eskertip, dabyl rejımin saqtady jáne turǵyndardy qaýipti aımaqtardan aýlaq bolýǵa shaqyrdy.

Shtat gýbernatory Romeý Zema óńirdiń aýyr kezeńdi bastan ótkerip jatqanyn málimdedi.

Onyń aıtýynsha, birneshe saǵat ishinde bir aılyq jaýyn-shashyn mólsheri túsken. Myńdaǵan adam jaryq pen sýsyz qalǵan. Evakýatsııalanǵan turǵyndar ýaqytsha ornalastyrý ortalyqtaryna aınaldyrylǵan mektepterge jetkizilgen. Alǵashqy gýmanıtarlyq júk kólikteri jóneltildi.

Brazılııa prezıdenti Lýıs Inasıý Lýla da Sılva úkimet Mınas-Jeraıstaǵy zardap shekkenderge kómek kórsetý úshin jumyldyrylǵanyn málimdep, qaza tapqandardyń otbasylaryna kóńil aıtty.

Osyǵan deıin Brazılııada laı kóshkinnen 22 adam kóz jumǵany týraly jazdyq.