Brazılııada júzdegen demonstranttar fýtboldan álem chempıonatyn ótkizýge qarsylyq bildirýde
ASTANA. 26 qańtar. QazAqparat - Fýtboldan ótetin álem chempıonaty úshin el qarajatynyń shyǵyndalýyna qarsylyq bildirgen manıfestatsııalar senbi kúni Brazılııanyń birneshe qalasynda ótti.
Rıo-de-Janeıro, San-Paýlý, Resıfı, Kýrıtıba kóshelerine shyqqan demonstranttar memleket qarajatyn bilim men densaýlyq salalaryna jumsaýdy talap etti. Rıo-de-Janeıro kóshelerine úsh júzdeı adam shyqsa, San-Paýlýda qarsylyq bildirý sharasyna 2,5 myń adam qatysqan. San-Paýlý ortalyǵynda betperde kıgen jastar toby dúkenderdegi jaımasóreler men bankterdiń terezelerin qıratqan. Buzaqylar sondaı-aq polıtsııanyń patrýldik mashınasyn aýdaryp tastaýǵa áreket jasaǵan, júrgizýshisi toqtaý týraly sózderine qulaq aspaǵan soń, bir mashınany órtep jibergen. Polıtsııa alańnan taratý úshin Black Block anarhııalyq-ekstremıstik top ókilderine kózden jas aǵyzatyn gaz shashyratqan.
Fýtboldan álem chempıonatynyń oıyndary bıylǵy jyldyń 12 maýsymy men 13 shildesi aralyǵynda Brazılııanyń 12 qalasynda bolmaq. Brazılııa Prezıdenti Dılma Roýsseff juma kúni Davostaǵy Dúnıejúzilik ekonomıkalyq forýmda: «Elimiz fýtbol tarıhyndaǵy eń keremet mýndıaldi ótkizýge ázir», - dep sendirdi.
.
