Brazılııada jeńil motorly ushaq turǵyn úıge soǵyldy: adam shyǵyny bar
ASTANA. KAZINFORM – Brazılııada jeńil motorly ushaq turǵyn úıge soǵylyp, úsh adam qaza tapty, dep habarlaıdy CNN Brazil telearnasy.
Apat 4 mamyr kúni Belý-Orızontı qalasynda bolǵan. Áýe kemesi úsh qabatty turǵyn úıge soǵylyp, keıin avtoturaqqa qulaǵan. Belgili bolǵandaı, apat aldynda ushqysh dıspetcherlermen baılanysyp, ushyp kóterilý kezinde týyndaǵan aqaýlar týraly habarlaǵan.
Ushaq bortynda barlyǵy bes adam bolǵan. Oqıǵa saldarynan eki ushqysh birden qaza taýyp, taǵy úsh adam jaraqat alǵan. Olardyń ishindegi jaǵdaıy aýyr dep baǵalanǵan bir jolaýshy keıinirek aýrýhanada kóz jumdy.
Apattyń mán-jaıyn polıtsııa tekserip jatyr.
Eske sala ketsek, 2 mamyr kúni Tehas shtatynda shaǵyn ushaq áýede otqa oranyp, apatqa ushyrady. Cessna 421C bortynda pıklbol komandasynyń bes oıynshysy bolǵan. Barlyq jolaýshy men ushqysh oqıǵa ornynda qaza tapty.
Oǵan deıin 25 naýryzda Kolýmbııada ushaq apatynan 69 adam qaıtys bolǵanyn jazdyq.
