Brazılııada jasóspirim mektepte oq jaýdyryp, eki qyzmetker mert boldy
ASTANA. KAZINFORM – Tapansha ustaǵan 13 jastaǵy jasóspirim Brazılııanyń Rıo-Branko qalasyndaǵy San-Jose ınstıtýtyna basyp kirip, oq jaýdyra bastaǵan. Dálizde kezekshilikte turǵan mekteptiń eki qyzmetkeri oqıǵa ornynda kóz jumdy, dep habarlaıdy RTE100.
Taǵy eki adam, sonyń ishinde bir bala jaraqat aldy.
Úreılengen oqýshylar qasha jónelip, keıbireýleri mektepti kórshiles qonaqúıden bólip turǵan alty metrlik qabyrǵaǵa órmeleýge tyrysty. Qonaqúı ákimshisi Edýardý Rodrıges Kavalkantı AFP agenttigine tek bir adam sekirip, ishke jasyryna alǵanyn aıtty. Qalǵandary mektep shatyrynda qaldy.
- Men atys dybystary men qatty aıqaıdy estidim, - dep qosty ol.
Belgili bolǵandaı, jasóspirim advokat ógeı ákesiniń úıde saqtaǵan 380 kalıbrli tapanshasyn urlap áketken. Shabýyldan keıin ol áskerı polıtsııaǵa óz erkimen berildi, dep jazdy brazılııalyq Diario de Pernambuco agenttigi.
Shabýyldaýshynyń osy mektepte oqıtyny nemese oqyǵany ázirge belgisiz. Polıtsııa qylmystyq is qozǵap, sebebin anyqtap jatyr.
Shtat bıligi men Rıo-Branko qalalyq ákimshiligi qurban bolǵandardyń otbasylaryna jáne mektep qaýymdastyǵyna qaıǵyryp kóńil aıtty. Barlyq memlekettik mektepterde sabaq úsh kúnge toqtatyldy, oqýshylar men muǵalimder úshin psıhologııalyq qoldaý uıymdastyryldy.
Osyǵan deıin Túrkııada mektepte bolǵan atystan 4 adam qaza taýyp, ondaǵan adam jaraqat alǵanyn habarladyq.
Al AQSh-ta atys saldarynan segiz bala mert boldy.
