Brazılııada «Volkswagen» kompanııasyna quldyq deńgeıindegi eńbek úshin aıyppul salyndy

ASTANA. KAZINFORM – Brazılııanyń eńbek soty Volkswagen kompanııasynyń jergilikti bólimshesin 1974-1986 jyldary jumysshylardy quldyqqa teń jaǵdaıda ustaǵany úshin 165 mln real kóleminde (shamamen 26 mln eýro) ótemaqy tóleýge mindettedi, dep habarlaıdy DW.

Tergeý málimetinshe, Para shtatyndaǵy kontsernge qarasty fermada 300-ge jýyq adam zańsyz jaldanyp, ormandy tazalaý men jaıylym jasaýǵa májbúr bolǵan. Jumysshylarǵa jetkilikti tamaq berilmegen, olar qarýly kúzettiń baqylaýynda bolǵan. Tipti bezgekke shaldyqqandarǵa medıtsınalyq kómek te kórsetilmegen.

Bul derekter tek 2019 jyly jarııa bolyp, 2024 jyly resmı aıyp taǵyldy. Prokýratýra muny «Brazılııa tarıhyndaǵy qazirgi zamanǵy quldyqtyń eń iri oqıǵalarynyń biri» dep atady.

Volkswagen sot sheshimine apellıatsııa bermek. Kompanııa jumysshylardy resmı túrde jaldamaǵanyn aıtqanymen, sot ony aıypty dep tapty.

Nemis kontserni Brazılııaǵa birinshi ret ótemaqy tólep otyrǵan joq. 2020 jyly ol San-Paýlýdaǵy zaýytta dıktatýra kezeńinde (1964-1985 jj.) saıası belsendi qyzmetkerlerdi ańdyp, olardyń derekterin bılikke bergeni úshin 5,7 mln eýro ótemaqy tólegen bolatyn.

Aıta keteıik, Brazılııada quldyq resmı túrde 1888 jyly joıylǵanymen, jumysshylardyń eńbegin qanaý áli de kezdesedi. 1995 jyldan beri arnaıy mobıldi toptar el boıynsha mundaı zańsyzdyqtarǵa qarsy tekseris júrgizip keledi.

Buǵan deıin Volkswagen Qytaıdaǵy zaýytyn jabatynyn jazdyq.