Brazılııada ushaq apaty: barlyq jolaýshy qaza tapty

ASTANA. KAZINFORM – Brazılııanyń Gramadý qalasynda shaǵyn ushaq apatqa ushyrady. Saldarynan borttaǵy 10 adamnyń barlyǵy qaza taýyp, onnan astam adam jaraqat aldy, dep habarlaıdy Kazinform CNN-ge silteme jasap.

Ulttyq azamattyq qorǵanystyń málimetinshe, apat ushaq áýege kóterilgennen keıin birneshe mınýt ótken soń bolǵan. Ushaq aldymen ǵımarattyń murjasyna, keıin úıge, sońynda jıhaz dúkenine soǵylǵan.

Rıý-Grandı-dý-Sýl shtatynyń azamattyq qorǵanysynyń málimetinshe, kem degende 17 adam zardap shekken. Olardyń kópshiligi apattan shyqqan órt tútininen ýlanyp, aýrýhanaǵa jetkizildi.

Rıý-Grande-dý-Sýl gýbernatory Edýardo Leıteniń habarlaýynsha, ushaq bortyndaǵy 10 adamnyń barlyǵy qaza tapqan. Memlekettik azamattyq qorǵanystyń málimetinshe, olardyń barlyǵy bir otbasynyń músheleri.

Bılik qaıǵyly oqıǵanyń sebebin anyqtaýdy jalǵastyryp jatyr. Brazılııa prezıdenti Lýıs Inasıý Lýla da Sılva qaza tapqandardyń otbasyna kóńil aıtty.

– Zardap shekkender tez saýyǵyp ketedi dep úmittenemin. Áskerı-áýe kúshteri oqıǵanyń sebebin anyqtap jatyr. Al federaldy úkimet shtat pen jergilikti bılik organdaryna jaǵdaıdy tezirek anyqtaý úshin kómektesýge daıyn, - dep jazdy ol X áleýmettik jelisinde.

Eske sala ketsek, tamyz aıynda Brazılııanyń San-Paýlý qalasyna jaqyn jerde Voepass kompanııasynyń jolaýshylar ushaǵy apatqa ushyrady. Kompanııanyń habarlaýynsha, ushaqta 61 adam bolǵan. Jolaýshylar men ekıpaj músheleriniń eshqaısysy tiri qalmaǵan. Brazılııa prezıdenti Lýıs Inasıo Lýla da Sılva qaıǵyly oqıǵa týraly jańalyq belgili bolǵan kezde ózi sóz sóılegen sharada bir mınýt únsizdik jarııalady. Keıin ol qaza tapqandar úshin elde úsh kún aza tutý kúnin jarııalady.