Brazılııada tolassyz jaýǵan jańbyr 7 adamnyń ómirin qıdy, tórteýi iz-túzsiz joǵalǵan
RIO-DE-JANEIRO. QazAqparat – Brazılııanyń Rıo-de-Janeıro shtatynda tolassyz jaýǵan jańbyr saldarynan keminde jeti adam qaza taýyp, tórt adam iz-túzsiz joǵalyp ketti. Bul týraly dúısenbi kúni Globo telearnasy habarlady.
Aqpan aıynda jaýǵan jańbyrdyń saldarynan 230-dan astam adam qaza tapqan taýly Petropolıs qalasynda qutqarýshylar apattan zardap shekken taǵy bes adamnyń denesin tapty. Prefektýranyń málimeti boıynsha, qalanyń ártúrli bólikterinde jeksenbi kúni nebári 12 saǵattyń ishinde 307-den 370 mm-ge deıin jaýyn jaýǵan. Al aqpandaǵy qaıǵyly kúni Petropolıste 260 mm jaýyn jaýdy. Oqıǵa ornyna qutqarý qyzmetteri jumys istep jatyr.
Rıo-de-Janeıro shtatynyń ońtústik jaǵalaýyndaǵy Angra-dýs-Reıs kýrorttyq qalasynda taǵy eki adam qaza tapty.
