Brazılııada sýdyń jylynýynan 100-den astam delfın qyrylyp qaldy
Brazılııada qatty qurǵaqshylyq pen sý temperatýrasy rekordtyq dárejege deıin, keı jerlerde 39 Tselsııa gradýsqa (Farangeıt boıynsha 102 gradýs) deıin kóterilip, júzden astam delfın óldi, dep habarlaıdy QazAqparat agenttigi CNN basylymyna silteme jasap.
Brazılııa ǵylym mınıstrligi qarjylandyratyn zertteý ortalyǵy – Mamıraýa ınstıtýtynyń deregi boıynsha, keıingi jeti kún ishinde Tefe kóliniń jaǵasynan 100-den astam delfınniń óligi tabylǵan (Tefe kóli – Amazonkanyń oń jaq taraýy sanalatyn Tefe ózeniniń saǵasyndaǵy úlken sý aıdyny).
Instıtýt osynshalyqty kóp delfınniń ólýi – óte sırek qubylys ekenin aıtyp, oǵan sýdyń rekordtyq dárejedegi joǵary temperatýrasy men Amazonkada buryn-sońdy bolmaǵan qýańshylyq sebep bolýy múmkin ekenin málim etti.
Álemdegi eń iri sý arterııasy sanalatyn Amazonka ózeni qazirgi kúni qurǵaqshylyqtan zardap shegip otyr. Rekordtyq joǵary temperatýra ózendegi basqa da faýna ókilderine zııan keltirip jatyr.
Zertteýshiler men belsendiler aman qalǵan delfınderdi qutqarmaq nıetpen olardy lagýna men toǵannan ózenniń shetindegi salqyndaý bólikke jiberýge tyrysyp jatyr, dep habarlady CNN Brasil, biraq olardyń mekeni alys bolǵandyqtan operatsııa qıyndap ketken.
Amazonııadaǵy qurǵaqshylyq el ekonomıkasyna da keri áserin tıgizedi.
Sý deńgeıi Amazonas shtatynyń 59 mýnıtsıpalıtetinde ortashadan da tómen dárejege túsip ketti. Bul jaǵdaı ózendegi kólik jáne balyq aýlaý qyzmetine zalal keltirip jatyr.
Elde aldaǵy birneshe aptada qazirgiden de aptap ystyq bolýy múmkin, ol delfınderdiń taǵy da qyrylýyna ákeledi degen boljam bar, dep habarlady CNN Brasil.
