Brazılııada sottalǵan otandasymyz jazasyn Qazaqstanda óteýdi surap otyr
NUR-SULTAN. QazAqparat – Brazılııada esirtkige qatysty qylmys boıynsha sottalǵan qazaqstandyq áıel jazasyn óz elinde óteýdi surap otyr, dep habarlaıdy QazAqparat tilshisi.
«Keıingi jyldary Qazaqstannyń 4 azamaty jazasyn ótep jatqan edi. Onyń úsheýi bosady. 7 jylǵa sottalyp, jazasyn ótep jatqan Qazaqstannyń bir azamaty (áıel) bizge aryzyn joldap, qalǵan merzimin Qazaqstanda óteýdi surady. Osy eki el arasyndaǵy kelisimge qol qoıylǵan soń ol azamattyń qalǵan merzimdi Qazaqstan túrmesinde óteýge tolyq múmkindigi bar», - dedi Bas prokýrordyń orynbasary Marat Ahmetjanov Senatta tilshilerdiń suraǵyna jaýap bere otyryp.
Onyń aıtýynsha memlekettiń basty mindetteriniń biri – Qazaqstan azamattary qandaı jaǵdaıda qandaı qıyndyqqa dýshar bolsa da, kómek-qoldaý kórsetý, elge ákelý, quqyqtyq kómek kórsetý.
«Qatelespesem onyń jaza merziminen 5 jyl qalǵan», - dedi ol.
Aıta ketsek Senat qabyrǵasynda búgin Brazılııamen Qazaqstan arasynda qylmystyq ister boıynsha quqyqtyq kómek, tulǵalardy ustap berý jáne sottalǵan azamattarmen almasý týraly zań jobasyn ratıfıkatsııalaý máselesi qaralyp, Parlamenttiń keńeıtilgen otyrysyna engizý týraly sheshim qabyldandy.
