Brazılııada obyr dıagnostıkasyna arnalǵan qalam alǵash ret synaqtan ótti

ASTANA. KAZINFORM — Brazılııada operatsııa kezinde isik jasýshalaryn anyqtaı alatyn biregeı qalamnyń klınıkalyq synaqtary bastaldy, dep habarlaıdy TV BRICS.

Ónertabysty 33 jastaǵy brazılııalyq hımık Lıvııa Eberlın jasaǵan. Qalam portatıvti jáne tinderdiń molekýlalyq sıgnatýrasyn oqı otyryp, olardyń saý nemese qaterli ekenin anyqtaıdy. Mundaı tehnologııa hırýrgke isiktiń tolyq alynǵanyna kóz jetkizýge múmkindik berip, operatsııalardy anaǵurlym qaýipsiz ári tıimdi etedi.

— Qalamda sýǵa arnalǵan rezervýar bar. Quraldyń ushy tinnen molekýlalardy jınap, olardy mass-spektrometrge baǵyttaıdy. Ol tinniń qaterli-qatersiz ekenin anyqtaıdy, — dep túsindirdi Eberlın.

Júıe jasandy ıntellektini qoldanyp, molekýlalyq profıldi derekter bazasymen salystyrady jáne nátıjeni 90 sekýnd ishinde shyǵarady.

Zertteýdiń alǵashqy kezeńinde 200-den astam tin úlgileri taldandy, olar qaterli isikti anyqtaýda 97% dáldik kórsetken. Jalpy klınıkalyq synaqtar 24 aıǵa sozylǵan, oǵan 60 patsıent qatysqan: olardyń 30-y – ókpe isigimen, 30-y – qalqansha bezi qaterli isigimen aýyratyndar.

Buǵan deıin tehnologııa sút bezi, mı, analyq bez jáne qýyqasty bezi isikterin emdeý kezinde sátti qoldanylǵan.

Sonymen qatar medıtsınalyq dıagnostıka salasyndaǵy ázirlemeler BRIKS-tiń basqa elderinde de belsendi júrgizilip jatyr: Reseıde qýyqasty bezi isiginiń erte dıagnostıkasyna arnalǵan jańa radıofarmatsevtıkalyq preparat jasaldy, al Iranda qan qaterli isigin jyldam anyqtaıtyn qurylǵy ázirlendi.

Aıta keteıik, Qazaqstanda 2025 jyly alǵash ret anyqtalǵan qaterli isiktiń 43 myńnan astam jaǵdaıy tirkeldi. Túrli onkologııalyq aýrýlar boıynsha esepte 400 myńnan astam azamat tur.

Buǵan deıin biz onkoskrınıngke qandaı zertteýler kiretinin jazǵan bolatynbyz.