Brazılııada ótken COP30 sammıtinde tarıhı deklaratsııa qabyldandy
ASTANA.KAZINFORM - Brazılııanyń Belem qalasynda klımattyń ózgerýine baılanysty ótken BUU-nyń 30-shy konferentsııasynda 12 elden turatyn top klımattyń ózgerýi týraly deklaratsııaǵa qol qoıdy, dep habarlaıdy BUU jańalyqtar qyzmeti.
Deklaratsııaǵa qol qoıǵan elder: Brazılııa, Kanada, Chılı, Danııa, Fınlıandııa, Frantsııa, Germanııa, Ispanııa, Shvetsııa, Ýrýgvaı, Nıderland jáne Belgııa.
Qujatta ınternettegi jalǵan kontentpen kúres, klımat jáne qorshaǵan orta máselelerimen aınalysatyn jýrnalısterge, ǵalymdarǵa jáne zertteýshilerge baǵyttalǵan shabýyldardy toqtatý boıynsha naqty sharalar belgilengen.
Osy jyldyń maýsym aıynda bastalǵan bastamany Brazılııa úkimeti, BUU-nyń jahandyq kommýnıkatsııalar departamenti jáne ıÝNESKO júzege asyryp jatyr.
— Jalǵan aqparat protsestiń kez-kelgen bóligine qaýip tóndirýi múmkin. Bul - dıplomatııalyq kelissózder, kún tártibin júzege asyrý, halyqaralyq qaýymdastyqty jumyldyrý nemese sammıtterdi uıymdastyrý. Eger biz jalǵan aqparatqa durys qarsy tura almasaq, bizdiń barlyq kúsh-jigerimizge qaýip tónedi, onyń tamyry faktilerdi joqqa shyǵarýda, — dep atap ótti SOR30 aqparattyń senimdiligi jónindegi arnaıy ókili Frederıko Assıs.
Ol qasaqana jáne manıpýlıatsııalyq mazmundy kúsheıtetin jáne jalǵan aqparatty taratý úshin «kúrdeli taktıka» qoldanatyn algorıtmderge alańdaýshylyq bildirdi.
Bastama aıasynda qurylǵan Jahandyq klımattyq senimdilik qory 100-ge jýyq elden 447 ótinim aldy, olardyń úshten ekisi damýshy elderden.
Aıta keteıik, COP30 klımattyq sammıti Brazılııada 10 qarashada bastaldy.
Osyǵan deıin Brazılııa prezıdentiniń álem elderin klımatqa qatysty batyl sheshim qabyldaýǵa shaqyrǵany týraly jazdyq.
«Men álem kóshbasshylaryn klımattyń ózgerýine qarsy kúres sharalaryn jedeldetýge shaqyramyn. Adamzattyń qazba otynǵa táýeldiligin ádil ári josparly túrde eńserýge, ormansyzdaný úderisin toqtatýǵa jáne osy maqsatqa qajetti resýrstardy jumyldyrýǵa múmkindik beretin jol kartasy qajet... sóz ispen ushtasýy tıis», dedi Lýla da Sılva.