Brazılııada nóser jaýynnan kem degende 56 adam qaza tapty

NUR-SULTAN. QazAqparat - Seısenbiden beri tolassyz jaýǵan jańbyr sýynyń tasqyny men kóshkin saldarynan Brazılııanyń soltústik-shyǵysyndaǵy Resıfe jáne Olında mýnıtsıpalıtetterinde kem degende 56 adam qaza taýyp, sonsha adam iz-túzsiz joǵalyp ketti, dep habarlaıdy QazAqparat Euronews-ke silteme jasap.

Pernambýký shtatynyń azamattyq qorǵanysy 4 myńǵa jýyq turǵyny baspanasynan aıyrylǵanyn habarlady. Jergilikti bılik aldaǵy kúnderi aýa raıynyń áli de nasharlaýy múmkin ekenin eskertedi.

Brazılııa prezıdenti Jaır Bolsonarý qaza tapqandardyń otbasylaryna kóńil aıtyp, izdeý-qutqarý operatsııasyna kómektesý úshin óńirge ásker jiberdi.

Eń kóp zardap shekken eki qalaǵa shamamen jarty mıllıon eýro (2,5 mıllıon brazılııalyq real) kóleminde gýmanıtarlyq kómek bólindi.

Jyl basynan beri júzdegen brazılııalyq tabıǵı apattan qaıtys boldy. Aqpan aıynyń ózinde Rıo-de-Janeıro shtatynyń Petropolısinde sý tasqynynan 230-dan astam adam qaza tapty.