Brazılııada laı kóshkinnen 22 adam kóz jumdy

ASTANA. KAZINFORM — Brazılııanyń Mınas-Jeraıs shtatynda rekordtyq jańbyr jaýyp, kóshkin men sý tasqyny saldarynan 22 adam qaza taýyp, júzdegen adam baspanasyz qaldy, dep habarlaıdy ANEWZ.

Órt sóndirý jáne qutqarý qyzmetkerleri balshyq astynda qalǵan ondaǵan turǵyndy tabýǵa tyrysty.

Mamandandyrylǵan kınologııalyq bólimshelerdiń qoldaýymen qaýipsizdik kúshteri jumyldyryldy. Bılik ázirge sý tasqynynan qaza tapqandardyń sanyn habarlaǵan joq.

Daýyldan eń kóp zardap shekken ónerkásiptik qala Jýız-de-Fora boldy. Qaıtys bolǵan 22 adamnyń 16-sy osy qaladan edi. Olar úılerdi birneshe sekýndta basyp qalǵan kóshkinniń saldarynan kóz jumdy.

Qalanyń basty ózeni men onyń salalary jarylyp, birneshe saǵattyń ishinde shahardyń búkil aýmaǵyn shaıyp ketti.

Jýız-de-Fora qalasy úshin aqpan eń ylǵaldy aı boldy, 584 mıllımetr jaýyn jaýyp, ylǵaldylyq ortasha aılyq mólsherden eki esege artyq boldy. Dúısenbi kúni bastalǵan nóser, kelesi kúnge deıin toqtamady, kerisinshe kúsheıe berdi.

Seısenbi kúni tańerteń sý deńgeıiniń kóterilýine baılanysty Jýız-de-Fora meri Margarıda Salomao tótenshe jaǵdaı jarııalady.

— Jaǵdaı óte aýyr. Biz adamdardyń ómirin saqtap qalý jáne qamaýda qalǵandarǵa kómek kórsetý úshin tynymsyz jumys istep jatyrmyz, — dedi Salomao qutqarý operatsııasy kezinde jazylǵan beıne habarlamada. 

Mınas-Jeraıs gýbernatory Romeý Zema úsh kúndik aza tutý jarııalady. Sondaı-aq ol jergilikti órt sóndirý brıgadalary men kórshiles mýnıtsıpalıtetterden jiberilgen 150 qosymsha qyzmetkerlerdiń qatysýymen aýqymdy qutqarý jumystaryn júrgizý úshin Jýız-de-Foraǵa kelip, jaǵdaıdy baqylaýǵa alady.

Park Býrn aýdanynda órt sóndirýshiler bir kóshedegi 12 úıdiń jappaı qıraýynan keıin 17 adam, onyń ishinde bes bala iz-túzsiz joǵalǵanyn habarlady. Qutqarýshylar úıindiler astynan aman qalǵan 9 adamdy alyp shyqty.

Qazirgi ýaqytta 440-tan astam adam úsh memlekettik mektepke ornalastyryldy. Olardyń birazynyń úıi qıraǵan nemese qaıta turýǵa tym qaýipti dep tanylǵan.

Bılik ókilderi jaýynnyń áli de jaýatynyn eskertip, qaıta kóshkin bolýy múmkin ekenin aıtty.

Eske salaıyq, Brazılııa astanasynda buǵan deıin birneshe aıyppen sottalǵan eldiń burynǵy prezıdenti Jaır Bolsonarýny qoldaý aktsııasy kezinde 72 adam naızaǵaıdan zardap shekti.