Brazılııada kóshkin júrip, 65 adam mert boldy
ASTANA. QazAqparat - Brazılııanyń ońtústik-shyǵysyndaǵy San-Paýlý shtatynyń jaǵalaýynda nóser jańbyr sý tasqyny men kóshkinge ulasyp, tabıǵı apat saldarynan qaza tapqandar sany bir aptada 65 adamǵa jetti, dep habarlaıdy QazAqparat Sınhýa aqparat agenttigine silteme jasap.
Agenttikke bul týraly jergilikti bılik málim etken.
Qurbandar arasynda kámeletke tolmaǵan 19 bala bar.
Áskerı bólimsheler, órt sóndirýshiler, eriktiler men qutqarýshylar qaza bolǵandardyń denelerin shyǵarý jáne joǵalǵan adamdardy izdestirý jumystarymen aınalysyp jatyr.
Zardap shekkenderdiń kópshiligi San-Sebastıandaǵy Barra-dý-Sası jaǵajaıyna jaqyn Serra-de-Mar taý jotasynyń baýraıyndaǵy qaýipti aımaqtardaǵy kedeı aýdandarda turǵan.
Kóshkinniń qaıtalaný qaýpine baılanysty baspanasynan aıyrylǵan 2440-qa jýyq adam evakýatsııalanýǵa májbúr boldy.
19 aqpanda jaǵalaýdaǵy Bertıoga, Karagýatatýba, Gýarýja, Ilıabela, San-Sebastıan jáne Ýbatýba qalalarynda táýlikten az ýaqyt ishinde Brazılııada rekordtyq deńgeıde jańbyr jaýdy.
Brazılııanyń Integratsııa jáne aımaqtyq damý mınıstrliginiń baǵalaýynsha, apat qaýpi bar 14 myń aımaqta 4 mln-ǵa jýyq adam turyp jatyr.
