Brazılııada esirtkige qarsy operatsııa kezinde 120-dan astam adam qaza tapty

ASTANA. KAZINFORM — Rıo-de-Janeıro qalasynda esirtki mafııasyna qarsy júrgizilgen aýqymdy reıd barysynda 100-den astam adam qaza tapty, dep habarlaıdy DW.

Basylymnyń málimetinshe, bul – el tarıhyndaǵy eń qanquıly polıtseılik operatsııa. Brazılııa bıligi 119 adamnyń kóz jumǵanyn rastady, alaıda advokattardyń deregi boıynsha, qaza tapqandar sany 130-dan asady.

«Qyzyl komanda» dep atalatyn bandaǵa qarsy reıdter 28–29 qazan kúnderi qalanyń soltústigindegi Alemao jáne Penıa favelalarynda ótken. Arnaıy operatsııaǵa shamamen 2,5 myń quqyq qorǵaý qyzmetkeri jumyldyrylǵan.

Rıo-de-Janeıro ákimshiliginiń habarlaýynsha, operatsııa barysynda 118 atys qarýy, sonyń ishinde avtomattar men jarylǵysh zattar tárkilengen. 113 adam, onyń ishinde 10 jasóspirim ustalǵan.

Aıta keteıik, kelesi aptada Brazılııanyń bul megapolısinde BUU-nyń klımat jónindegi konferentsııasy aıasyndaǵy is-sharalar ótpek.

Brazılııanyń ádilet mınıstri Rıkardo Levandovskı qaza tapqandardyń otbasylaryna kóńil aıtyp, el prezıdenti Lýıs Inasıý Lýla da Sılvanyń da «qurbandardyń kóptigine qatty kúıingenin» jetkizdi.

BUU Bas hatshysy Antonıý Gýterrısh te polıtsııa reıdteri saldarynan bolǵan adam ólimine baılanysty qatty alańdaýshylyq bildirdi. Ol Brazılııa bıligin adam quqyqtaryn saqtaýǵa jáne oqıǵany muqııat tergeýge shaqyrdy.

Reıdti ondaǵan halyqaralyq jáne jergilikti quqyq qorǵaý uıymdary, sonyń ishinde Amnesty International uıymy da aıyptady. Al AFP agenttigine suhbat bergen jergilikti turǵyndar men advokattar keıbir ustalǵandardyń basyna oq atyp, óltirilgenin aıtqan.

Eske sala ketsek, AQSh áskeri Tynyq muhıtynda esirtki tasyǵan tórt kemege soqqy jasaǵanyn jazdyq.