Brazılııada esirtki qylmysy úshin sottalǵan erli-zaıypty jazasyn Qazaqstanda óteýi múmkin
ASTANA. QazAqparat - Búgingi kúni Brazılııada Qazaqstannyń 4 azamaty jazasyn óteýde. Bul týraly búgin QR Bas prokýrorynyń orynbasary Marat Ahmetjanov aıtty, dep habarlaıdy QazAqparat tilshisi.
«Keshe Brazılııanyń Ádilet mınıstrligi men QR Bas prokýratýrasy arasynda úsh ekijaqty kelisimshartqa qol qoıdyq. Birinshisi - quqyqtyq kómek kórsetý. Ekinshisi - bir-birimizge qylmyskerlerdi berý. Úshinshisi - sottalǵan adamdardy óz elderine jazasyn odan ary óteý úshin berý», - dedi Bas prokýrordyń orynbasary.
Onyń aıtýynsha, atalǵan qujattar Brazılııada sotty bolǵan Qazaqstan azamattaryna tolyq quqyqtyq kómek kórsetýge múmkindik beredi.
«Bizdiń málimetimizge sáıkes, Brazılııada Qazaqstannyń 4 azamaty sottalǵan. Olar sol jaqtaǵy túrmede jazasyn ótep jatyr. Aýyzsha kelisim bar. Eger sol jaqtaǵy azamattarymyz elge qaıtqysy kelse, biz Brazılııaǵa qoldaýhat jiberemiz. Sonyń negizinde Brazılııa kelisimsharttardy ratıfıkatsııalamaı-aq, ózara túsinistikti negizinde qazaqstandyqtardy qaıtarady. Sottalǵan azamattardyń úsheýiniń esirtki qylmysyna qatysy bar. Onyń ekeýi erli-zaıyptylar», - dedi Marat Ahmetjanov.
Onyń sózine qaraǵanda, qazaqstandyqtar elge oralǵannan keıin de Brazılııada kesilgen jaza merzimin tolyqtaı óteıdiǵ ıaǵnı túrmede otyrady.
«Biz Qazaqstandyq azamattardy elge qaıtarý týraly Brazılııaǵa usynys bildiremiz. Usynysty Brazılııanyń Ádilet mınıstrligi qarap, qazaqstandyq azamattarǵa beredi. Eger olar kelisim berse, onda elge qaıtarýdy bastaımyz», - dedi ol.
