Brazılııada dárigerler sıam egizderin bir-birinen ajyratyp aldy
Rıo-de-Janeıroda úsh jastaǵy Bernardo men Artýr Lımaǵa Londondaǵy Greıt-Ormond-strıt aýrýhanasynan kelgen dárigerlerdiń basshylyǵymen ota jasaldy. Dárigerler kompıýterlik tomografııa men magnıttik-rezonanstyq tomografııa negizinde uldardyń anatomııasynyń vırtýaldy modelin jasap, olardy ajyratýdyń qaýipsiz ádisin tabýǵa birneshe aı jumsady.
Hırýrg Nýr ýl Ovase Djılanı otany «ǵarysh dáýiriniń ónimi» dep atady. Onyń aıtýynsha, hırýrgtar alǵash ret ártúrli elderde otyryp, bir «vırtýaldy bólmede» birge jumys istegen. Gemini Untwined klınıkasynyń negizin qalaýshy dáriger Djılanı buǵan deıin Pákistan, Sýdan, Izraıl jáne Túrkııadan kelgen sıam egizderine ota jasaǵan.
Egizderdi klınıkaǵa ata-anasy eki jarym jyl buryn ákelgen jáne osy ýaqyt boıy baqylaýda bolǵan. Egizderge birneshe ret ota jasaldy. Lıma egizderi barlyǵy jeti otadan ótti. Sońǵy ota 27 saǵatqa sozyldy. Oǵan 100-den astam dáriger qatysty.
Bernardo men Artýr ajyratylǵannan keıin qan qysymy men júrek soǵysy birden joǵarylaǵan. Bul barlyq sıam egizderinde bólingennen keıin bolatyn jaǵdaı. Tórt kúnnen soń olar bir palataǵa jatqyzyldy. Bir-biriniń qolynan ustaǵannan keıin kórsetkishteri qalypqa kelgen. Endi olar alty aı saýyqtyrýdan ótedi.
Statıstıka boıynsha sıam egizderi 50-60 myń jaǵdaıda bir ret dúnıege keledi. Olardyń 5% kranıopagtar, ıaǵnı bas súıekteri birigip týady.
Foto: PA Media