Brazılııada Bolsonarý jaqtastary prezıdent saraıy men kongress ǵımaratyna basyp kirdi
BRAZILIA. QazAqparat – Brazılııanyń burynǵy prezıdenti Jaır Bolsonarýdyń júzdegen jaqtasy eldiń Ulttyq kongresine basa kóktep kirgen. Polıtsııa kóz jasaýratatyn gaz qoldandy, dep habarlaıdy QazAqparat VVS agenttigine silteme jasap.
Olar sondaı-aq Joǵarǵy sot ǵımaratyna jáne prezıdent saraıyna kirgen. Shabýyl úsh saǵatqa sozyldy, keıin onyń qatysýshylaryn polıtsııa ustap áketti.
Brazılııa parlamenti men basqa da úkimettik ǵımarattarǵa shabýyl eldiń jańa prezıdenti Lýla da Sılvanyń ınaýgýratsııasynan keıin bir apta ótken soń jasaldy.
Bolsonarýdyń jaqtastary onyń saılaýdaǵy jeńilisin moıyndaýdan bas tartyp otyr.
Qazirgi tańda jumys saparymen San-Paýlý shtatynda júrgen Lýıs Inasıý Lýla da Sılva búlikshilerdi «vandalızm men fashızm áreketin» jasady dep málimdedi. Onyń aıtýynsha, el tarıhynda mundaı oqıǵa bolmaǵan.
«Vandaldar sııaqty aldyna kezdeskenniń bárin qıratyp jatyr. Qaýipsizdik oıdaǵydaı qamtamasyz etilmedi dep esepteımiz. Muny jasaǵannyń bári jazaǵa tartylady», - dedi Lýla.
Eske salaıyq, Brazılııanyń solshyldar kóshbasshysy Lýıs Inasıo «Lýla» da Sılva ótken saılaýda qazirgi prezıdent, «brazılııalyq Tramp» atanǵan Jaır Bolsonarýdy az ǵana basymdyqpen jeńip, úshinshi ret prezıdent bolǵan edi.
Foto: GETTY IMAGES
