Brazılııada avtobýs pen júk kóligi soqtyǵysyp, keminde 11 adam qaza tapty

ASTANA. KAZINFORM — Brazılııada avtobýs pen júk kóligi jol apatyna ushyrap, keminde 11 adam qaza tapty, taǵy 46 adam jaralandy. Bul týraly Sınhýa málim etti.

Eldiń Federaldy jol polıtsııasy senbi kúni habarlaǵandaı, Brazılııanyń ortalyq-batysyndaǵy Matý-Grosý shtatynda juma kúni keshke tas jolda avtobýs pen júk kóligi soqtyǵysyp, keminde 11 adam kóz jumdy, taǵy 46 adam jaraqat aldy. 

Agencia Brasil ulttyq aqparat agenttiginiń málimetinshe, jaraqat alǵandardyń ishinde 8 adamnyń jaǵdaıy jeńil, 26 adam ortasha aýyr jaraqat alǵan, al 12 adam, sonyń ishinde júk kóliginiń júrgizýshisi aýyr halde jatyr.

Jol-kólik apaty Lýkas-dý-Rıý-Verdı qalasynyń mańynda, Matý-Grosý shtatynyń astanasy Kýıaba qalasynan shamamen 360 km qashyqtyqta bolǵan. Avtobýs Kýıabadan eldiń iri agrobıznes ortalyǵy bolyp sanalatyn Sınop qalasyna baǵyt alǵan.

Apattyń naqty sebepteri azamattyq polıtsııa tarapynan tekserilip jatyr.

Budan buryn seısenbi kúni Brazılııanyń soltústik-batysyndaǵy Manaýs qalasyndaǵy eki avtokólik zaýytynda iri órt shyqty. Jalyn 20 saǵattan astam ýaqyt boıy sónbegeni belgili boldy.