Brazılııada álemdegi eń qart áıel 116 jasynda qaıtys boldy

ASTANA.KAZINFORM — Jer betindegi eń qart adam, brazılııalyq monah áıel Ina Kanabarro Lýkas 116 jas 326 kúnde qaıtys boldy, dep jazady VVS.

Bul týraly Portý-Alegrı qalasyndaǵy dinı qaýymdastyq habarlady.

AQSh-ta ornalasqan Gerontologııa zertteý toby (GRG) jáne LongeviQuest derekter bazasyna sáıkes, Lýkas qaıtys bolǵannan keıin álemdegi eń qart áıel tıtýly ótken tamyzda 115 jasqa tolǵan Anglııanyń Sýrreı qalasynda turatyn Etel Keıteremge berildi.

Ina Kanabarro Lýkas qańtarda 116 jastaǵy japon áıeli Tomıko Itooka qaıtys bolǵannan keıin álemdegi eń qart adam atandy.

LongeviQuest monah áıeldiń 110-shy týǵan kúninde ótken dúısenbide 88 jasynda qaıtys bolǵan Rım Papasy Frantsıskten bata alǵanyn habarlaıdy.

Lýkastyń ózi týǵan kúni 1908 jyldyń 27 mamyry dep málimdegenimen, qujattarǵa sáıkes ol 8 maýsymda dúnıege kelgen.

Ina Kanabarro Lýkas Brazılııanyń ońtústigindegi Rıo-Grandı-dý-Sýl shtatynda dúnıege kelgen, dep habarlaıdy gerontologııalyq zertteý toby.

Ol brazılııalyq general Devıd Kanabarronyń shóberesi boldy, al onyń ákesi 1923 jylǵy soǵysta qaza tapty. Bala kezinde Lýkas óte aryq bolǵan, bul tipti onyń ómirine alańdaýshylyq týdyrdy, dep jazady GRG.

Ol ınternatta oqyp, 1928 jyly Ýrýgvaı astanasy Montevıdeoǵa kóship keldi, onda monah bolya, eki jyldan keıin Brazılııaǵa oraldy jáne Rıo-de-Janeırodaǵy mektepte portýgal tili men matematıkadan sabaq bere bastady.

2021 jyldyń qańtarynda, 112 jasynda Lýkas koronavırýsqa qarsy vaktsınanyń alǵashqy dozasyn aldy, al 2022 jyldyń qazan aıynda aýrýhanada jatyp kovıd juqtyrdy. Bir aıdan keıin saýyǵyp, aýrýdan aman qalǵan eń qart adamdardyń biri boldy.

Eńbek jáne halyqty áleýmettik qorǵaý mınıstrliginiń 2024 jylǵa arnalǵan málimeti boıynsha Qazaqstanda 100 jastan asqan 423 adam turady.