Brazılııada ádetten tys ystyqtyń saldarynan sońǵy úsh kúnde 32 qart adam kóz jumdy
ASTANA. Aqpannyń 11-i. QazAqparat - Álem elderiniń birazy saqyrlaǵan sary aıazdan, qalyń jaýǵan qardan abyrjyp otyrsa, Brazılııada ádetten tys ystyq aýa raıy saqtalýda.
Sońǵy úsh kúnde onda ystyqqa júrekteri shydamaı, 32 qart adam kóz jumǵan. Bul týraly RBK agenttigi habarlap otyr.
El ókimetiniń ókilderiniń habarlaýynsha, bul málimetter tek Santos qalasyna qatysty. Derekkózderdiń naqtylaýynsha, qaıtys bolǵan adamdardyń jastary - 60 pen 90 jastyń aralyǵynda bolǵan. Bılik ókilderiniń aıtýynsha, olardyń barlyǵynyń dıabet nemese gıpertonııa sııaqty sozylmaly aýrýlary bolǵan.
Santos qalasynda aýa temperatýrasy bul kúnderi Tselsıı baǵamy boıynsha plıýs 39 gradýsqa jetip otyr.
