Brazılııada 90-nan asa adam sý tasqynynyń qurbany boldy
RIO-DE-JANEIRO. TASS-QazAqparat – Brazılııada Rıo-de-Janeıronyń Petropolıs taýly aýdandarynda nóser jańbyr jaýyp, kóshkin men sý tasqyny saldarynan qaza tapqandar sany 94-ke jetti, olardyń segizi – kámelettik jasqa tolmaǵandar.
Bul týraly QazAqparat reseılik TASS agenttigine silteme jasap habarlaıdy.
Budan buryn 71 adamnyń qaza tapqany týraly habarlanǵan.
Qazirgi kezde qutqarýshylar úıindiler astynan 24 adamdy shyǵardy, 35 adam izdestirilip jatyr. Atalǵan jumystarǵa 400 qutqarýshy, 200 polıtseı, sonymen qatar áskerıler men eriktiler jumyldyrylǵan. Shtat gýbernatory Klaýdıý Kastrý seısenbi kúni keshten bastap tótenshe jaǵdaı saldaryn joıý jónindegi vedomstvoaralyq kúshterdi úılestirý úshin qalaǵa keldi.
«Bul 1932 jyldan bergi jaýǵan eń qatty jańbyr boldy», - dep málimdedi gýbernator BAQ-qa.
Budan erterek jedel qyzmetter shamamen 190 kóshkin men 230 kishi apat týraly aqparat alǵan, 80 turǵyn úıge zaqym kelip, olardyń kem degende 54-i tolyǵymen qıraǵan. Qalaǵa seısenbi kúni alty saǵat ishinde 260 mm jaýyn-shashyn túsken. Qala bıligi qaraly kún jarııalap, tótenshe jaǵdaı rejımin engizdi. Sınoptıkteriń boljaýynsha, jaqyn kúnderi taǵy da jaýyn-shashyn túspek.
Brazılııa Prezıdenti Jaır Bolsonarý qazirgi kezde is-saparmen Máskeýde júr. Ol áleýmettik jelilerde tabıǵı apattan zardap shekkenderge kómek kórsetý, sonymen qatar áskerlerdi jumyldyryp, apat saldaryn joıý týraly buıryq berdi. Bolsonarý juma kúni Reseı men Majarstanǵa saparynan oralǵannan keıin birden qalaǵa kelýi kerek. Bolǵan oqıǵaǵa baılanysty Reseı basshysy Vladımır Pýtın kóńil aıtty.
Brazılııanyń soltústigi, ońtústigi men ońtústik-shyǵysynda jaz kezinde (jeltoqsannyń aıaǵy men naýryzdyń aıaǵy aralyǵy) mol jaýyn jaýady, qaýipti jaǵdaı jyl saıyn qaıtalanyp otyrady. Ol Amozonııadaǵy ekvatorlyq ormandaǵy jyly ylǵaldy aýanyń ońtústik-shyǵys baǵytta Atlant muhıtyna qaraı jyljýynan bolyp otyr. 2020 jyldyń qańtarynda eldiń ońtústik-shyǵysynda bolǵan tabıǵı apattan 66 adam qaza tapty. 2021 jylǵy qarasha – jańbyrly maýsymnyń basynan beri Baııa, Mınas-Jeraıs, Rıo-de-Janeıro jáne San-Paýlý shtattarynda 150-den asa adam qaza tapqan.
2011 jyly qańtarda kóshkin men sý tasqyny saldarynan Rıo-de-Janeıronyń taýly aýdandarynda 900-den asa adam qaıtys bolyp, 100-ge jýyq adam iz-túzsiz joǵalǵan, 35 myń turǵyn úısiz qalǵan.
