Brazılııa telearnasynda jas jas ónerpaz Dımash Qudaıbergenge tánti ekenin aıtty
ASTANA. KAZINFORM - Brazılııanyń Domingo Espetacular telebaǵdarlamasynda qazaqstandyq ánshi Dımash Qudaıbergenniń shyǵarmashylyǵy jáne onyń jas mýzykanttardyń kásibı qalyptasýyna tıgizgen yqpaly týraly baıandaldy, dep habarlaıdy Dimashnews.
Dımashtyń esimi erekshe vokaldyq qabiletiniń arqasynda áleýmettik jelilerde keńinen tanylǵan 21 jastaǵy brazılııalyq ánshi Vanderleı Jýnıorǵa (Vanderlei Júnior) arnalǵan telesıýjette ataldy.
Suhbat barysynda jas ónerpaz Dımash Qudaıbergenniń shyǵarmashylyǵymen alǵash ret 13 jasynda tanysqany týraly aıtty. Dál osy kezeńde onyń klassıkalyq vokal ónerine degen qyzyǵýshylyǵy oıanǵan eken.
-13 jasymda men Dımash esimdi ánshiniń ónerine erekshe tánti boldym. Ol – Qazaqstannyń týmasy eken. Onyń úni álemdegi eń ǵajaıyp daýystardyń biri dep esepteımin. Dımashtyń ánderin tyńdaı júrip, klassıkalyq mýzyka álemin tanı bastadym. Sol kezde: «Men de sol sııaqty bolǵym keledi», – dep oılaǵanym esimde. Onyń óneri meni qanattandyrdy», – dep bólisti Vanderleı.
Qazirgi ýaqytta brazılııalyq jas talant kásibı mýzykalyq jolyn qalyptastyryp, opera óneriniń bıik belesterin baǵyndyrýǵa umtylýda.
Osyǵan deıin Meksıkadaǵy Dears qaýymdastyǵyna Dımash týraly 60 kitap tabystalǵany týraly jazdyq.
