Brazılııa prezıdentin tańdaýda: Lýla men Bolsonarý arasyndaǵy tartys
ASTANA. KAZINFORM — Jeksenbi kúni Brazılııada prezıdent saılaýy ótip jatyr. Onyń qorytyndysy eldiń solshyl baǵyttaǵy bılikti saqtaıtynyn nemese AQSh prezıdenti Donald Tramp qoldaıtyn konservatıvti ońshyl baǵytqa bet buratynyn aıqyndaýy múmkin, dep habarlaıdy Euronews.
Qazirgi memleket basshysy, solshyl qozǵalystyń 80 jastaǵy ardageri Lýıs Inasıý Lýla da Sılva prezıdenttikke tórtinshi ret, ózi atap ótkendeı, sońǵy merzimge saılanýǵa talpynyp otyr.
Ol Donald Tramp ákimshiliginiń qysymyna baılanysty Brazılııanyń egemendigine qaýip tónip turǵanyn málimdedi.
Al onyń basty qarsylasy — 45 jastaǵy senator Flavıo Bolsonarý bul máselede múlde basqa ustanymda. Brazılııany 2019-2022 jyldary basqarǵan Jaır Bolsonarýdyń uly Flavıo Bolsonarý Vashıngtonmen qarym-qatynasty jaqtaýshy retinde tanylyp, Aq úımen jaqyndyǵyn atap kórsetedi. Sondaı-aq ol Brazılııaǵa Tramp ákimshiligimen, ásirese sırek kezdesetin mıneraldardy óndirý salasynda tıimdi kelisimder qajet dep sanaıdy.
Saýalnamalarda eki kandıdattyń arasyndaǵy aıyrmashylyq az bolǵan. Saýalnamalardyń birinde Lýla da Sılvany 45%, al Bolsonarýdy 43% respondent qoldaǵan.
Saıasattanýshylardyń pikirinshe, kandıdattardyń eshqaısysy 50 paıyzdan astam daýys jınaı almaýy múmkin. Mundaı jaǵdaıda 25 qazanda saılaýdyń ekinshi kezeńi ótedi.
Sonymen qatar brazılııalyqtar jeksenbi kúni 27 shtattyń gýbernatorlaryn, zań shyǵarý jınalystarynyń depýtattaryn, federaldyq tómengi palatadaǵy 513 depýtattyń barlyǵyn jáne 54 senatordy saılaıdy.
Brazılııada daýys berý — mindetti. Saılaý ýchaskesine kelmegen azamat ne úshin barmaǵanynn túsindirýi tıis.
Buǵan deıin habarlanǵandaı, senator Flavıo Bolsonarý Brazılııa prezıdenttigine Lıberaldyq partııadan resmı túrde kandıdat retinde usynyldy.
