Brazılııa prezıdentimen G20 sammıtine birge barǵan ushaqtan 39 kg kokaın tabyldy
NUR-SULTAN. QazAqparat - G20 sammıtine Brazılııa prezıdenti Jaır Bolsonarýdyń laınerimen birge barǵan áskerı ushaqtardyń birinen 39 kg kokaın tabyldy, dep habarlaıdy VVS.
Brazılııa qorǵanys mınıstrliginiń habarlaýynsha, esirtki zaty sammıt ótip jatqan Osaka qalasyna baǵyt alǵan ushaqtyń Sevılge tranzıttik qonýy kezinde tabylǵan.
Brazılııa jáne ıspanııalyq BAQ-tyń málimetinshe, 38 jastaǵy serjant Manýel Sılva Rodrıges ustaldy. Ol Brazılııanyń úsh prezıdentin 29 halyqaralyq saparlarǵa alyp júrgen.
Ispan polıtseıleri «El Paıs» gazetine Rodrıgestiń ushaqtan júkpen shyqqanyn aıtty. Tekserý kezinde júk sómkesinen kokaın salynǵan 37 túıinshek tabylǵan.
Rodrıges - prezıdent Bolsonarýdy sammıtten keri qaıtar jolda alyp júrýge mindetti ushaq ekıpajynyń múshesi.
Prezıdent Osakaǵa barar jolda Lıssabonǵa qonǵan basqa laınermen ushty. Prezıdent ushaǵy jospardan tys Sevılge qonýǵa tıis boldy.
Brazılııa vıtse-prezıdenti Amılton Moýrannyń málimdeýinshe, ustalǵan serjant kásibı esirtki tasymaldaýshy bolyp shyqty.
«Onyń qolynda bolǵan esirtki zatynyń kólemine qaraǵanda ol ony jaı kósheden satyp ala sap, ózimen alyp júrmegen. Ol kásibı esirtki tasymaldaýshy bolyp tur», - dedi vıtse-prezıdent.
Jaır Bolsonarý Tvıtterge ustalǵan serjantqa qatysty eń aýyr jaza qoldanylatyndyǵyn jazdy. Ol onyń áreketin óreskeldikke balap, qorǵanys mınıstrliginiń tergeý amaldaryna qatysýyn talap etti.
