Brazılııa Prezıdenti Snoýdenniń kesirinen AQSh-qa jumys saparymen barmaı qaldy
ASTANA. 18 qyrkúıek. QazAqparat - Barzılııa Prezıdenti Dılma Rýsserff 2013 jyldyń 23 qazanyna josparlanǵan AQSh-qa resmı saparymen barmaıtyn boldy, dep habarlady RBK.
Bul týraly sheshim Reseıge qashyp ketken Ulttyq qaýipsizdik agenttiginiń (UQA) burynǵy qyzmetkeri Edvard Snoýdennen alynǵan málimetterdi jarııalaý kezinde týyndaǵan tyńshylyq janjalmen baılanysty shyǵaryldy. Osy málimetterge sáıkes, UQA D.Rýsserfftiń telefon áńgimelerin tyńdap, elektrondyq poshtasyn baqylap otyrǵan, sonymen qatar Petroleo Brasileiro (Petrobras) Brazılııa memlekettik munaı kompanııasynyń basqan izin ańdyǵan.
AQSh Prezıdenti Barak Obama bolǵan jaǵdaıdyń mán-jaıyn anyqtaýǵa ýáde berdi. Perzıdent ákimshiliginde habarlaǵandaı, 2013 jyldyń 16 qyrkúıeginde B.Obamanyń bastamasymen eki memleket basshysy telefon arqyly atalǵan janjalǵa qatysty sóılesken.
«Prezıdent D.Rýsserfftiń atalǵan málimetterge baılanysty AQSh-tyń barlaý qyzmetteri jasaǵan tyńshylyǵyna alańdaýshylyq bildiretinin jaqsy túsinedi jáne oǵan ókinish bildiredi», - dep aıtylǵan Aq úıdiń málimdemesinde. - Ol eki el arasyndaǵy yntymaqtastyǵyna nuqsan keltirgen máseleni Prezıdent D.Rýsserffpen birlese sheshýge daıyn ekenin jetkizdi».
Prezıdent B.Obamanyń sózine silteme jasap, Aq úıdiń resmı ókili Djeı Karnı: «Jumys saparyn keıinge qaldyrý týraly sheshim birlese qabyldanǵanyn» habarlady. Onyń jeke pikirinshe, AQSh úshin Brazılııamen qarym-qatynas óte mańyzdy ekenin aıtty.
Brazılııa Úkimeti óz kezeginde D.Rýsserfftiń AQSh-qa resmı sapary jýyq arada, ıaǵnı atalǵan másele «tıisti túrde sheshimin tapqannan keıin» bolatynyna senim bildirdi.
