Brazılııa Prezıdenti 2014 jylǵy fýtboldan álem chempıonatyna arnalyp jańartylǵan alǵashqy stadıondy saltanatpen ashty
ASTANA. 17 jeltoqsan. QazAqparat - Brazılııa Prezıdenti Dılma Roýsseff jeksenbi kúni 2014 jyly fýtboldan álem chempıonaty jáne 2013 jyly Konfederatsııa Kýbogy oıyndary ótetin tolyq jańartylǵan alǵashqy stadıondy saltanatpen ashty, dep habarlady ITAR-TASS.
Eldiń soltústik-shyǵysyndaǵy Seara shtatynyń ortalyǵy - Fortalezada «Kastelan» stadıonynyń alańynda memleket basshysy alǵashqy sımvoldyq dop tepti.
Jergilikti oıyn jankúıerleri men bilgirleri Brazılııa tarıhyndaǵy alǵashqy áıel-prezıdenttiń soqqan doby onsha myqty bolmaǵanyna pálendeı mán bergen joq. Іri ońtústikamerıkandyq elde onsyz da fýtbol dobyn dóńgeletip áketetin sheberler jetkilikti.
«Kastelan» álemdik birinshilikter alańdaryna FIFA qoıatyn talaptarǵa tolyq saı keledi. 1973 jyly salynǵan stadıondy jańǵyrtýǵa 250 mln. dollarǵa jýyq qarjy jumsaldy. Álem chempıonaty kezinde stadıon minberine 65 myń jankúıer sııady. Keıinirek baspasóz ókilderine arnalǵan oryndardy yqshamdaý arqyly oryn sanyn 67 myńǵa deıin ulǵaıtý kózdelip otyr.
«Brazılııa Konfederatsııa Kýbogy men álem chempıonatyna ázirliktiń sheshýshi kezeńine aıaq basty», - dep atap kórsetti Roýsseff «Kastelan» sport arenasynyń ashylý saltanatynda. 15 sáýirge - Halyqaralyq fýtbol qaýymdastyqtary federatsııasy (FIFA) belgilegen eń sońǵy merzimge deıin - Konfederatsııa Kýbogy ótetin barlyq alty stadıon ázir bolýy tıis. Aldaǵy aptanyń ishinde Belý-Orızontıdaǵy stadıon ázir bolady. Naýryzdyń sońyna deıin Rıo-de-Janeıroda, Brazılıada, Resıfı men Salvadorda jańa fýtbol stadıondarynyń ashylý saltanattary ótedi.
