Brazılııa prezıdenti álem elderin klımatqa qatysty batyl sheshim qabyldaýǵa shaqyrdy
ASTANA. KAZINFORM — Brazılııa prezıdenti Lýıs Inasıý Lýla da Sılva dúısenbi kúni álem elderin klımattyń ózgerýine qarsy kúres aıasynda ulttyq deńgeıde aıqyndalǵan basymdyqtardy ázirleýge jáne ony barynsha iske asyrýǵa shaqyrdy, dep jazdy Sınhýa.
«Men elderdi óz mindettemelerin oryndaýǵa shaqyramyn. Bul — ulttyq deńgeıde aıqyndalǵan batyl úlesterdi ázirleý men júzege asyrýdy bildiredi», — dedi ol klımattyń ózgerýi jónindegi BUU Rama konventsııasyna múshe elderdiń 30-konferentsııasyn ashý barysynda.
Brazılııa basshysynyń aıtýynsha, klımattyń ózgerýi endi bolashaqtyń qaýpi emes, búgingi kúnniń tragedııasyna aınaldy. Ol jahandyq jylynýdyń aýyr zardaptary men adamdarǵa ákelip otyrǵan qaıǵy-qasiretin atap ótti. Prezıdent Amazonııanyń «júreginde» konferentsııa ótkizý sheshimin «qıyn, biraq qajetti qadam» dep sıpattady.
«Men álem kóshbasshylaryn klımattyń ózgerýine qarsy kúres sharalaryn jedeldetýge shaqyramyn. Adamzattyń qazba otynǵa táýeldiligin ádil ári josparly túrde eńserýge, ormansyzdaný úderisin toqtatýǵa jáne osy maqsatqa qajetti resýrstardy jumyldyrýǵa múmkindik beretin jol kartasy qajet... sóz ispen ushtasýy tıis», dedi Lýla da Sılva.
Sonymen qatar ol halyqaralyq qaýymdastyqty klımatqa qatysty kún tártibinde adamdy basty nazarǵa qoıýǵa úndedi. Onyń aıtýynsha, jahandyq jylyný mıllıondaǵan adamdy ashtyq pen kedeılikke uryndyryp, ondaǵan jyldar boıǵy damýdy keıinge shegerýi múmkin.
Brazılııa prezıdenti ádil ekologııalyq ótpeli kezeńniń ǵasyrlar boıy kómirqyshqyl gazyn shyǵarýdan týyndaǵan Soltústik pen Ońtústik arasyndaǵy teńsizdikti azaıtýǵa baǵyttalýy qajet ekenin aıtty.
Aıta ketsek, Brazılııa jahandyq orman qoryna ınvestıtsııa salatyn alǵashqy el bolatynyn jazdyq.
Al klımattyń ózgerýine baılanysty dúnıejúzindegi ormandarǵa úlken qaýip tónip tur.