Brazılııa orman órtin sóndirýge «Úlken jetilik» usynǵan qarjydan bas tartty
NUR-SULTAN. QazAqparat - Brazılııa úkimeti Amazonııadaǵy alapat orman órtin sóndirýge «Úlken jetilik» usynǵan qarjydan bas tartatynyn málimdedi, dep habarlaıdy «QazAqparat» HAA VVS-ge silteme jasap.
Frantsııa prezıdenti Emmanýel Makron «Úlken jetilik» Brazılııaǵa 22 mln dollar usynýǵa ázir ekenin bildirgen bolatyn. Biraq Brazılııa bıligi kómekten bas tartyp, onyń sebebin túsindirgen joq.
Brazılııa qorǵanys mınıstri Amazonııadaǵy órt baqylaýda ekenin aıtty. Al Brazılııa prezıdenti ákimshiliginiń basshysy Onıks Lorenzonı Globo-ǵa bergen suhbatynda: «Rahmet, árıne, biraq bul qarajatty Eýropadaǵy ormandardy qalpyna keltirýge jumsaǵan durys edi», - degen.
Brazılııada jalyn qushaǵynda qalǵan orman aýmaǵy rekordtyq deńgeıge jetken. Ótken aptada Makron Amazonııa apatyn halyqaralyq daǵdarys dep sıpattady.
Brazılııa bıligi órtti sóndirýge armııany jumyldyryp, 44 myń áskerı Amazonııa aımaǵyna jiberilgen.
Brazılııada qazir qurǵaq maýsym. Bul kezde Ońtústik Amerıkada orman órti órshı túsedi. Biraq bıyl tilsiz jaý byltyrǵdan 85% úlken aýmaqty jalmap otyr. Ony spýtnıkten alynǵan sýretter de kórsetti.
Aıta keteıik, Jer betindegi eń iri tropıkalyq orman osy Amazonııa aımaǵynda. Orman birneshe eldiń aýmaǵyn qamtıdy, biraq kóp bóligi Brazılııanyń úlesinde.
Amazonııanyń Jerdegi klımatty saqtaýdaǵy orny orasan zor. Ný ormannyń kómirtegini jutyp, ottegi shyǵaratyn qasıetine bola ǵalymdar ony «Ǵalamshardyń ókpesi» dep ataıdy. Munda ósimdikter men janýarlardyń úsh mıllıonnan astam túri bar, budan bólek, mıllıonǵa jýyq baıyrǵy halyq ókilderi de osy ormandy mekendeıdi.
Dúısenbi kúni gollıvýd akteri Leonardo Dı Kaprıo Amazonııadaǵy orman órtin sóndirýge 5 mln dollar bóletinin málimdedi.
