Brazılııa men Eýropany jańa sý asty kabeli baılanystyrady
ASTANA.16 qańtar. QazAqparat - Brazılııa memlekettik Telebras telekommýnıkatsııalyq kompanııasy osy el men Eýropany baılanystyratyn sý asty ınternet-kabelin júrgizý boıynsha aýqymdy jobanyń júzege asyrylý merzimi týraly jarııalady,
dep habarlaıdy ITAR-TASS.
Kompanııanyń resmı ókili Ronald Valladannyń málimdeýinshe, «jalpy quny 185 mln. dollardy quraıtyn kabeldi júrgizý boıynsha jumystar bıylǵy jyldyń ekinshi jartysynda bastalyp, 18 aı ishinde aıaqtalýy tıis». Ol úshin ıspandyq IslaLink Submarine Cables kompanııasymen birigip, JVCo kásiporny quryldy, onyń sáıkesinshe 35% jáne 45% brazılııalyq jáne ıspandyq áriptesterge tıesili. Jospar boıynsha, kapıtaldyń 20% brazılııalyq ınvestıtsııalyq qorlar enshisinde.
Jańa ınternet-kabel kommertsııalyq múddelerdi kózdeýde de, qaýipsizdik turǵysynan da strategııalyq mánge ıe.
