Brazılııa qantyna táýeldilik qant baǵasyn sharyqtatty – Erbol Qarashókeev

NUR-SULTAN. QazAqparat – QR Aýyl sharýashylyǵy mınıstri Erbol Qarashókeev ortalyq kommýnıkatsııalar qyzmetinde ótken brıfıngte elge syrttan qant ımporttaýdaǵy qıyndyqtar baǵanyń sharyqtaýyna sebep bolǵanyn aıtty, dep habarlaıdy QazAqparat tilshisi.

Mınıstrdiń aıtýyna qaraǵanda, Brazılııanyń qant zaýyttary qantty tek aldyn ala tóleý arqyly jáne úlken kólemde satady.

Sondyqtan qazir Eýrazııa ekonomıka odaǵynan tys naryqtan keletin ónimge táýeldi bolyp qalǵan Qazaqstan sııaqty elder eki ortada Louis Dreyfus Company sııaqty iri transulttyq kompanııalardyń deldaldyǵyna júginýge májbúr.

«Transulttyq kompanııalar Brazılııadan qantty 60 myń tonnadan satyp alyp, Qara teńiz porttaryna aparady. Sodan keıin ǵana Qara teńiz aılaǵynan TMD elderine qantty az kólemde jetkizedi. Kórshi elderdegi geosaıası jaǵdaıǵa baılanysty týyndaǵan logıstıkalyq problemalar osy qanttyń óziniń keshigip jetýine túrtki boldy. Eger buryn Reseı Federatsııasy men Belarýs Respýblıkasynan ımport kezinde aq qantty jetkizý merzimi 4-10 kúntizbelik kúnge deıin bolsa, qazirgi ýaqytta Reseı Federatsııasy qant áketýge tyıym salǵannan keıin úshinshi elderden qant jetkizý merzimi 90 kúnge uzardy»,-dedi Erbol Qarashókeev.

Sondaı-aq, ol qazirgi tańda álem boıynsha qant pen onyń shıkizaty negizinen Brazılııa men Úndistannan alynyp jatqanyn aıtty.

«Olardyń óndiris kólemi shamamen 800 mln tonnany nemese álemdik naryqtyń shamamen 60%-yn quraıdy. Brazılııadan qant pen quraq shıkizatynyń ımporty Qara teńizdegi Grýzııa porttary arqyly jetedi. Grýzııa porttarynyń ótkizý qabiletiniń shekteýliligi, ınfraqurylym men kólik kemeleriniń jetkiliksizdigi kepteliske ákelip soqtyrýda. Úndistannan qant ımporty kezinde Haıraton Aýǵan shekara ótkelinde júkterdiń jınalýy baıqalady. Bul taýarlardy resimdeý men tıeý rásimderiniń sozylýyna ákeledi. Osylaısha, buryn ornyqqan búkil logıstıkalyq baılanys buzylǵan. Bul logıstıkanyń jáne Qazaqstanǵa qant pen shıkizatty jetkizý merziminiń uzarýyna ákep soqty. Qalyptasqan jaǵdaı qant baǵasynyń ósýine ákeldi. Osylaısha, qant shıkizaty qunynyń, kólik shyǵyndarynyń, sondaı-aq óńdeý shyǵyndarynyń qymbattaýy baıqalady», - dedi mınıstr.

Eske salsaq, Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalaǵan edi.

Foto: ortcom.kz