Brazılııa fýtbol akademııasynda 3 jyldan astam ýaqyt jattyqqan qazaqstandyq túlekter elge oralady - E. Qanaǵatov

Bul týraly búgin baspasóz máslıhatynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov málim etti.

Onyń sózine qaraǵanda, qazirgi ýaqytta Brazılııada tájirıbe men sheberlik shyńdap qaıtqan jigitterdi qazaqstandyq klýbtarǵa ornalastyrý jaıy qaralýda.

«Bıýdjettik qarajat jumsalǵandyqtan, biz olardyń sheberlikteriniń odan ári jetilýin toqtatpaı, jumsalǵan kúsh-jigerdi zaıa ketirmeýge tıispiz. Qazirgi ýaqytta elorda ákimdigi «Astana» komandasyn jasaqtaý ústinde. Atalmysh oıynshylardyń negizgi bóligi sol komandaǵa qosylýy múmkin, qalǵan fýtbolshylar basqa klýbtardyń sapyn toltyrady dep oılaımyn», - dep atap ótti E. Qanaǵatov.

Komıtet tóraǵasynyń atap ótkenindeı, búginde kelesi 3 jyldyq oqýǵa attanatyn jas fýtbolshylardyń jańa legin jasaqtaý jumystary bastalyp ketti.

Fýtbol salasyn damytý jónindegi alǵashqy áriptestik 2007 jyly QR Prezıdenti N. Nazarbaev pen Brazılııa Basshysy Lýıs Inasıo Lýla da Sılva arasynda Qazaqstannyń jasóspirimder fýtbolyn damytýǵa kómektesý kelisimi kezinde qol jetkizilgen bolatyn.

Kelisimniń negizinde 2009 jyly 4 naýryzda 26 jas sportshy Brazılııaǵa oqýǵa attanyp ketti. Olar «Ole Brazıl» mektebinde fýtbol sabaqtarynan bólek, jalpy bilim berý baǵdarlamasynyń pánderin oqyp shyqty. Otandastarymyz mektep atynan túrli jarystarǵa shyǵyp júrdi jáne 9 aıdyń ishinde barlyq týrnırlerde jeńiske jetip, úlken jetistikterge qol jetkizdi. Raýan Sarıev pen Berik Shaıhov «Ole Brazıl» klýbynyń jasóspirimder quramasyna endi. Keıin 17 jasar Raýan Sarıevti Brazılııanyń joǵarǵy lıgasyndaǵy adýynda klýbtyń biri «Atletıko Mıneıro» 3 jylǵa óz qataryna alyp aldy.

QR Týrızm jáne sport mınıstrligi qazaqstandyq balalardy San-Paolodaǵy «Ole Brazıl» akademııasynda oqytý úshin 83 mln. teńge bólgen bolatyn.