Brazılııa eks-prezıdentiniń uly senator Flavıý Bolsonarý AQSh-qa qashty
ASTANA. KAZINFORM – Brazılııadaǵy prezıdent saılaýynda jeńilgen senator Flavıý Bolsonarý sottyń elden shyǵýǵa salǵan tyıymyna qaramastan, otbasymen birge elden ketken. Bul týraly CNN Brasil telearnasy habarlady.
Telearnanyń málimetinshe, Brazılııanyń burynǵy prezıdenti Jaır Bolsonarýdyń uly otbasy múshelerimen birge AQSh-qa barǵan.
Birneshe brazılııalyq parlament múshesi ony senatorlyq mandatynan aıyrýdy usyndy. Sondaı-aq olar saıasatkerge jalaqy tóleýdi dereý toqtatýǵa shaqyrdy.
2026 jylǵy maýsymda Flavıý Bolsonarý Lıberaldyq partııadan Brazılııa prezıdenttigine kandıdat retinde usynylǵan edi. Saılaý naýqany aıasynda ol halyqaralyq baılanystaryn da jandandyryp, Vashıngtonda AQSh prezıdenti Donald Tramppen, vıtse-prezıdent Djeı Dı Venspen jáne Memlekettik departament basshysy Marko Rýbıomen kezdesken.
Brazılııada prezıdent saılaýynyń ekinshi kezeńi 25 qazanda bastaldy. Bul kezeńde Flavıý Bolsonarý qazirgi prezıdent Lýıs Inasıý Lýla da Sılvamen básekege tústi. Alaıda 26 qazanda Lýla da Sılva qaıta saılanyp, jańa merzimge ókilettigin 2027 jylǵy 1 qańtarda bastaıdy.
Eske sala keteıik, Flavıý Bolsonarýdyń ákesi, Brazılııanyń burynǵy prezıdenti Jaır Bolsonarý 2025 jylǵy qarashadan bastap memlekettik tóńkeris jasaý áreketi úshin 27 jyldyq jazasyn ótep jatyr. Ol 2022 jylǵy saılaýdan keıin Lýıs Inasıý Lýla da Sılvanyń prezıdenttik qyzmetke kirisýine kedergi keltirý maqsatynda sóz baılasqan dep tanylǵan. Prokýrorlardyń málimdeýinshe, jospar joǵary áskerı basshylyqtyń qoldaýyn ala almaǵandyqtan júzege aspaǵan.
Eske sala keteıik, buǵan deıin Lýla da Sılva Brazılııa prezıdenti bolyp qaıta saılanǵanyn jazdyq.
Al Qasym-Jomart Toqaev Lýla da Sılvany prezıdent saılaýyndaǵy jeńisimen quttyqtady.
