Brazılııa eks-prezıdenti Jaır Bolsonarýdyń soty bastaldy
BRAZILIA. QazAqparat – Brazılııa Joǵary saılaý sotynda beısenbi kúni burynǵy prezıdent Jaır Bolsonarýdyń soty bastaldy. Ol saılaýda burmalaý týraly jalǵan aqparat taratqany úshin aıyptalýda. Bul úshin Bolsonarý túrmege qamalmaıdy, biraq saılaýǵa túsýge tyıym salynýy múmkin, dep habarlaıdy QazAqparat VVS-ge silteme jasap.
Jaır Bolsonarý jalǵan aqparat taratý úshin Prezıdent bıligin asyra paıdalandy dep aıyptalyp jatyr.
Atap aıtqanda, byltyr shildede prezıdent saılaýy aldynda ol sheteldik elshilerdi jınap, olarǵa Brazılııada paıdalanylatyn elektrondy daýys berý mashınalardy hakerler buza alatynyn málimdep, qarsylastary saılaý nátıjelerin burmalaı alatynyn aıtqan.
Prezıdent saılaýy 2022 jyldyń qazanynda ótti. Ekinshi kezeńde Bolsonarý solshyl brazılııalyq saıasatker Lýıs Inasıý «Lýla» da Sılvadan az ǵana daýyspen jeńilip qaldy.
Joǵary saılaý soty qarap jatqan is – qylmystyq is emes, Jaır Bolsonarý ol úshin túrmege jabylmaıdy. Biraq, sot kollegııasy 68 jastaǵy eks-prezıdentke 8 jyl saılaýǵa túspeýge tyıym salýǵa quqyly.
Sondaı-aq, Bolsonarý birneshe qylmystyq is boıynsha tergeýge alynǵan, olardyń protsesi áli bastalǵan joq.
Bolsonarý saılaýdan keıin jáne onyń jaqtastary uıymdastyrǵan tártipsizdikterden keıin AQSh-qa, Florıdaǵa ushyp ketip, qaıta otanyna oraldy.
2026 jylǵy saılaýǵa túsetinin aıtqan joq, tek ózi qurmetti tóraǵa bolyp otyrǵan Lıberaldyq partııaǵa kelesi jylǵy jergilikti saılaýǵa kómektesýge ýáde etti.
Aıyptap otyrǵan tarap Bolsonarýdyń elshiler aldynda 2022 jyldyń 18 shildede sóılegen sózi saılaý týraly zańdy buzdy dep esepteıdi. Burynǵy prezıdent sheteldik dıplomattarǵa Brazılııadaǵy saılaý júıesi qalaı jumys isteıtinin túsindirdim dep sendiredi.
Ońshyl popýlıst Bolsonarýdy Donald Tramppen jıi salystyrady. Brazılııa prezıdentiniń men onyń jaqtastarynyń saılaýda jeńilgennen keıingi is-áreketi bir jyl buryn AQSh-ta bolǵan oqıǵany eske salady.
30 qazanda Lýladan ekinshi týrda nebári 1,8% aıyrmashylyqpen jeńilgennen keıin, Bolsonarý jeńilisin moıyndaýdan bas tartty — degenmen ol bılikti berýge daıyndyq bastaýdy buıyrdy. Eki aıdan keıin, Lýlanyń ınaýgýratsııasynyń aldynda ol AQSh-qa ushyp ketti.
Eske salaıyq, Brazılııanyń burynǵy prezıdenti Jaır Bolsonarýdyń júzdegen jaqtasy eldiń Ulttyq kongresine basa kóktep kirgenin jazǵan edik.
Olar sondaı-aq Joǵarǵy sot ǵımaratyna jáne prezıdent saraıyna kirgen. Shabýyl úsh saǵatqa sozyldy, keıin onyń qatysýshylaryn polıtsııa ustap áketti.
