Brazılııa bıznesmeni: Qazaqstanǵa ınvestıtsııa salýǵa daıynbyz
«Qazaqstanǵa eki eldiń arasyndaǵy baılanystardy jaqsartyp, taýar aınalymyn arttyra túsirý maqsatynda kelip otyrmyz. Bizdi energetıka, paıdaly qazbalar, blokcheın tehnologııasy men smart-sıtı jobalary qyzyqtyrady. Astanaǵa kelgennen beri «Qazaq ınvest» pen «QazEnerdjı» energetıka jáne munaı-gaz kesheni uıymdarynyń qaýymdastyǵy ókilderimen kezdesýler ótkizdik. Endi osy jumaǵa deıin Tımýr Qulybaev («QazEnerdjı» qaýymdastyǵynyń jáne «Atameken» UKP Tóralqa tóraǵasy) myrzamen kezdesýdi josparlap otyrmyz», - dedi brazılııalyq bıznesmen QazAqparat tilshisine bergen suhbatynda.
Tomas Martıns Qazaqstanǵa alǵash ret kelse de elimizdegi jalpy jaǵdaımen jete tanys. Elbasy Nursultan Nazarbaevtyń bıylǵy Qazaqstan halqyna Joldaýymen de habardar ekendigi baıqalady.
«Qazaqstanǵa birinshi ret kelip otyrmyn. Qala, halqy óte unady, baýyrmal. Eldegi progresti de baıqadyq. Prezıdent Nursultan Nazarbaevtyń bıylǵy Qazaqstan halqyna arnalǵan Joldaýymen tanyspyz. Onda Prezıdent myrza Qazaqstan joǵary tehnologııalarǵa umtylý qajettigin atap ótken, sonymen qatar qarapaıym halyqqa degen qurmet te anyq baıqalady», - dedi ol.
Onyń aıtýynsha, Qazaqstan qolaıly ınvestıtsııalyq ahýaldy qalyptastyrýynyń arqasynda syrtqy oıynshylardy ózine tartyp otyr. Sonyń nátıjesinde elde turaqty ekonomıkalyq damý bar, halyq jumyspen qamtylǵan. Sondyqtan da brazılııalyq bıznesmen qazaqstandyq seriktespen birlese otyryp, elimizde kez kelgen saladaǵy jobany júzege asyrýǵa qarjysyn quıýǵa ázir.
«Biz Qazaqstannyń kez kelgen salasyna ınvestıtsııa salýǵa daıynbyz. Búginde ınvestıtsııalyq qorjynymyzda 5 mlrd dollardyń jobasy bar. Bizdiń paıymdaýymyzsha, Qazaqstan ınvestıtsııa salý úshin óte qolaıly el. Jalpy, sizderdiń qarjy magnattaryńyzdan esh aıyrmashylyǵymyz joq. Kez kelgen qarjy magnaty kiris bar jerge barýǵa daıyn. Qazirgi ýaqytta bizdiń nazarymyz Ortalyq Azııa elderinde tek Qazaqstanǵa ǵana aýyp tur jáne osy elge ǵana ınvestıtsııa salǵymyz keledi», - dedi Tomas Martıns.
