Brazılııa bıligi Rıo-de-Janeırodaǵy Olımpıada qonaqtarynyń qaýipsizdigin qamtamasyz etýge sóz berdi
ASTANA. QazAqparat - Brazılııa bıligi Rıo-de- Janeırodaǵy Olımpıada oıyndaryna keletin sportshylar men jankúıerlerdiń qaýipsizdigin qamtamasyz etýge daıyn. Bul týraly baspasóz máslıhatynda Brazılııanyń Ádilet mınıstrligi buqaralyq sharalardy uıymdastyrý departamentiniń basshysy Andreı Aýgýstý Passýs Rodrıges málimdedi, dep habarlady TASS.
«Qaýipsizdikti qamtamasyz etý jaǵynan Olımpıada oıyndaryn ótkizýge daıyn ekenimizge senimdimin, - dedi Rodrıges. - Qosymsha polıtseılerdi tartý jáne qarýly kúshterdiń yqpaldasýymen tártipti qamtamasyz etemiz».
Sheneýnik jarys kezinde Rıo-de-Janeıroda qaýipsizdikti 85 myń adam, ıaǵnı 47 myń polıtseı men 38 myń áskerı qyzmetshi qamtamasyz etetinin eske saldy. Sonymen qatar, Rodrıges Olımpıada aldynda Brazılııa bıligi terrorızmge qarsy arnaıy ortalyq ashqanyn aıtty. Onyń jumysyna brazılııalyqtarmen qatar jeti eldiń - Argentına, Paragvaı, Belgııa, Ulybrıtanııa, Frantsııa, Ispanııa jáne AQSh mamandary qatysýda.
XXXI jyldyq Olımpıada 2016 jyly 5-21 tamyz aralyǵynda ótedi. Bul Ońtústik Amerıkada uıymdastyrylǵan alǵashqy Olımpıada oıyndary bolmaq. Paralımpıada 7- 18 qyrkúıek aralyǵynda ótedi.
