Brazılııa Aqtaý mańynda apatqa ushyraǵan AZAL ushaǵynyń «qara jáshigin» tekserýge kiristi

ASTANA.KAZINFORM — Brazılııa sarapshylary ótken aptada Qazaqstanda apatqa ushyraǵan AZAL ushaǵynyń qara jáshigindegi málimetterdi tekserýge kiristi. Bul týraly brazılııalyq G1 portaly habarlady, dep jazady AZERTADJ.

Avıatsııalyq oqıǵalardy tergeý jáne aldyn alý ortalyǵynda (CENIPA) Qazaqstan, Ázerbaıjan jáne Reseı ókilderiniń kezdesýi ótti. Sarapshylar qara jáshikten derek alý jáne taldaý boıynsha jumys istep jatyr, onda ushqyshtar arasyndaǵy baılanys jazbalary men ushaqtyń apatqa ushyraǵan sátine deıingi búkil ushý kezindegi jaǵdaıy týraly aqparat bar.

— CENIPA ne bolǵanyn ımıtatsııalaý jáne túsiný úshin grafıkalyq vırtýaldy rekonstrýktsııa jasaı alady. Brazılııalyq taldaýdyń nátıjesi Qazaqstan jaýap beretin tergeýdiń qorytyndy esebinde jarııalanady. Tehnıkalyq derekter apatty qoný kezindegi aqaýlardy, sondaı-aq Bakýden ushqan AZAL reısiniń baǵytyn ózgertýdi túsindirýge kómektesedi, — dep jazady basylym.

Tergeýge Brazılııanyń tartylǵan sebebi Embraer 190 ushaǵy osy elde jasalǵan.

Aıta keteıik, 25 jeltoqsanda Qazaqstannyń Aqtaý qalasyna jaqyn jerde AZAL-ǵa tıesili jáne Baký-Groznyı reısin oryndaǵan jolaýshylar ushaǵy apatqa ushyraǵan bolatyn. Ushaq bortyndaǵy 67 adamnyń 38-i qaza taýyp, 29-y aman qaldy.

Eske sala keteıik, buǵan deıin Qazaqstan borttaǵy ózdiginen jazǵysh quraldardy Brazılııaǵa jibergenin jazǵan edik.