Brazılııa AQSh-tyń 50 paıyzdyq tarıfine qarsy qoldaý josparyn iske qosty

ASTANA. KAZINFORM – Brazılııa bıligi AQSh prezıdenti Donald Tramptyń keıbir brazılııalyq eksport túrlerine 50 paıyzdyq tarıf engizýine baılanysty otandyq kompanııalardy qoldaý josparyn usyndy, dep habarlaıdy Euronews.

13 tamyzda prezıdent Lýıs Inasıý Lýla da Sılva eldiń eksporttaýshylaryna arnalǵan «Egemen Brazılııa» josparyn tanystyrdy. Baǵdarlamanyń negizgi bóligi – zardap shekken kompanııalar men salalardy qoldaý úshin ashylǵan 5,5 mlrd dollar kólemindegi nesıe jelisi. Lýla bul tek bastapqy kómek paketi ekenin, sondaı-aq memlekettik satyp alýlar arqyly qoldaý jalǵasatynyn atap ótti.

AQSh-tyń jańa tarıfteri 1 tamyzdan bastap kúshine engen. Brazılııa eń kóp zardap shekken elderdiń qatarynda. Aq úı ıesi bul sheshimdi Brazılııanyń amerıkalyq tehnologııalyq kompanııalarǵa «shabýyl jasaýy» jáne burynǵy prezıdent Jaır Bolsonarýǵa qatysty «saıası qýdalaý» júrgizýimen baılanystyrdy.

Jaýap retinde Lýla da Sılva ekonomıkalyq ózara árekettesý týraly zańdy retteıtin jarlyqqa qol qoıdy. Qujat Brazılııaǵa ekonomıkalyq damýǵa kedergi keltiretin birjaqty sanktsııalarǵa jaýap sharalaryn qabyldaýǵa múmkindik beredi.

Sonymen qatar, Brazılııa Dúnıejúzilik saýda uıymyna (DSU) AQSh tarıfterine qatysty konsýltatsııa suraýyn joldady. Bul – olardy daýlaý rásiminiń alǵashqy qadamy bolyp sanalady.

Aıta keteıik, Brazılııalyq kompanııalar jańa baj salyǵyna baılanysty AQSh-qa munaı jetkizýdi toqtatty.