Braýn ýnıversıtetindegi atys kezinde eki adam qaza tapty

ASTANA. KAZINFORM — AQSh-tyń Rod-Aılend shtatyndaǵy Provıdens qalasynda ornalasqan, Aıvı lıgasyna kiretin bedeldi Braýn ýnıversıtetinde bolǵan atys saldarynan keminde eki adam qaza taýyp, taǵy segiz adam aýyr halde aýrýhanaǵa jetkizildi. Bul týraly atalǵan oqý orny habarlady, dep jazdy Dw.com.

Ýnıversıtettiń málimetinshe, qarýly shabýyl jasaǵan adamdar áli ustalǵan joq. Quqyq qorǵaý organdary men AQSh-tyń Federaldy tergeý bıýrosy kúdiktini izdestirý jumystaryn jalǵastyryp jatyr. Ýnıversıtet ákimshiligi stýdentterge otyrǵan oryndarynan qozǵalmaı, barlyq esikterdi jaýyp, kampýs aýmaǵynda júrmeýge shaqyrdy.

Al qaza tapqandar men jaralanǵandardyń jeke tulǵalary anyqtalyp jatyr. Atys oqıǵasy ýnıversıtettiń ınjenerlik mektebi ornalasqan Barus & Holley ǵımaratynda bolǵan. Polıtsııa turǵyndar men stýdentterge oqıǵa ornyna jaqyndamaýdy eskertti.

Atalǵan ǵımaratta oqıǵa kezinde bolǵan barlyq stýdentter men ýnıversıtet qaýymdastyǵynyń múshelerine quqyq qorǵaý organdarymen baılanysý tapsyryldy. Oqys jaǵdaı týraly habar túsken soń, kóptegen adam aýdıtorııalarda ústelderdiń astyna jáne jıhazdardyń artyna tyǵylǵan.

AP agenttiginiń dereginshe, kúdikti tolyqtaı qara tústi kıimde bolǵan. Polıtsııa basshysynyń orynbasary Tımotı O’Haranyń aıtýynsha, shabýyl jasaǵan adam ınjenerlik mektep ǵımaratynan qashyp úlgergen.

Provıdens qalasynyń meri Brett Smaılı kampýs mańynda turatyn turǵyndardy úıden shyqpaýǵa shaqyrdy.

Eske sala ketsek, qarasha aıynda Aq úı mańyndaǵy atys bolyp, AQSh Ulttyq gvardııasynyń eki sarbazy jaralandy. Keıin olardyń bireýi aýrýhanada qóz jumdy.